बर्दगोरिया । कैलालीको बर्दगोरिया गाउँपालिका वडा नम्बर १ मा व्यवसायीक कृषि तथा पशुपालनको दिगो विकासका लागि किसानहरुसंग योजना तर्जुमा गोष्ठी सम्पन्न भएको छ । पालिकाको कृषि विकास शाखाको आयोजनामा सोमबार किसानको मागमा आधारित कार्यक्रम संचालनका लागि योजना तर्जुमा गोष्ठी गरिएको थियो ।
बर्दगोरिया गाउँपालिका वडा नम्बर १ का वडा अध्यक्ष मिथुन गौतमको सभाध्यक्षतामा भएको कार्यक्रमको प्रमुख अथिती पालिका उपाध्यक्ष गणेश राज गिरि (लालदिप) रहनु भएको थियो ।कार्यक्रमलाई सम्बोधन गर्दै उपाध्यक्ष गिरिले आर्थिक विकास र समृद्धिको लागि कृषि र पशुपालन व्यवसाय निकै महत्त्वपूर्ण भएको भन्दै यसको व्यवसायीकरण र दिगो विकासमा जोड् दिन आवश्यक रहेको बताउनुभयो ।
बढ्दो बेरोजगारीको समस्या समाधान गर्नका लागि कृषि क्षेत्र एक महत्त्वपूर्ण भएको भन्दै किसानको मागमा आधारित कार्यक्रम संचालन गरि किसानको सीप क्षमता ,दक्षता अनुदानमा सक्दो सहयोग पालिकाबाट हुने बताए ।
आगामी आर्थिक वर्षदेखि किसानको मागमा आधारित कृषि कार्यक्रम पालिकाको ६ वटै वडामा संचालन हुने जनाइएको छ । पालिकाको कृषि विकास तथा पशु स्वास्थ्य शाखाका अनुसार यो कार्यक्रममा विशेषगरि व्यवसायीक किसान ,कृषि फाम तथा कृषक समूह र कृषि सहकारी संस्थाहरुलाई समावेश गरिनेछ ।
कृषि तथा पशुपालन व्यवसायबाट किसानको आर्थिक उन्नति उकास्न ,कृषि तथा पशुपालन व्यवसायप्रति आकर्षण बढाउन र स्वदेशमै रोजगारीको अबसर सृजना गर्ने योजनालाई सार्थक पार्न स्थानीय सरकार ,प्रदेश सरकार र संघीय सरकारको कार्ययोजना स्वरुप किसानको मागमा आधारित कार्यक्रम संचालन गर्न लागिएको हो ।
योजना तर्जुमा कार्यक्रममा कृषि तथा पशुपन्छी र मत्स्य विकास कार्यक्रमको माग फारम भर्ने तरिका, कार्यक्रम संचालन भएपछि किसानले पाउने सेवा सुविधा तथा अनुदान ,कृषिकि लागि पुर्वाधार विकास परियोजना,साना सिचाइ ,उत्पादित कृषि सामाग्रीको लागि चाहिने बस्तुका बारेमा जानकारी गराएको छ ।
कृषि शाखाकाअनुसार पालिकामा रहेका ६ वटै वडामा १२ वटा पकेट क्षेत्र घोषणा गरि यो कार्यक्रम लागु गर्ने तयारी छ । बर्दगोरियामा कृषि तथा पशुपालन व्यवसायको दिगो विकासको रणनीतिक योजना तयार पारी किसानको मागमा आधारित अनुदानसहितको कार्यक्रम संचालनको तयारी गरेका छौ, पालिकाका कृषि शाखा प्रमुख झङकर बहादुर रावतले भने यसमा विशेष गरि व्यवसायिक किसान, कृषि फार्म,कृषक समूह र कृषि सहकारी संस्थालाई समावेश गरिनेछ । किसानको मागमा आधारित संचाललित हुने कार्यक्रम भएको हुँदा अहिले हामीले पालिका भित्रका किसानको अबस्था, उनीहरूको समस्या तथा चुनौती र किसानले गर्न चाहेको व्यवसायको बारेमा जानकारी लिने काम गरिरहेका छौ ।
सरकारले कृषि तथा पशुपालन व्यवसायको दिगो विकास र आर्थिक समृद्धिका लागि थुप्रै अनुदानको व्यवस्था समेत गरेको छ तर त्यो अनुदान वास्तविक किसानको हातमा पार्न अनुगमन तथा मुल्यांकन गरि यो कार्यक्रममा समेट्ने छौ- पालिकाका पशु शाखा प्रमुख जय प्रसाद कोइरालाले भने यो कार्यक्रममा दर्ता भएका कृषि फार्म,समूह र सहकारी संस्थामात्रै छनौटमा पर्नेछ्न ।
मागमा आधारित कार्यक्रम अन्तर्गत व्यवसायिक फलफूल, व्यवसायिक तरकारी विकास ,व्यवसायीक पशुपालन , व्यवसायिक मत्स्य पालन, व्यवसायिक बीउ उत्पादन,
खाद्य तथा पोषण सुरक्षा तथा क्षमता विकास लगाएत समेटिनेछ ।