बर्दगोरिया । कैलालीको बर्दगोरिया गाउँपालिका वडा नम्बर ४ को दानुवाफाटामा मुक्त कमैयाहरुको लागि निर्माण गरिएका घरहरू हस्तान्तरण गरिएको छ । 
सुरक्षित आवास परियोजना अन्तर्गत ह्याबिट्याट फर ह्युमिनिटी, राष्ट्रिय दलित नेटवर्क र सुदूरपश्चिम प्रदेश सरकारको लागत साझेदारीमा निर्माण गरिएका १२ वटा घरहरु शुक्रबार हस्तान्तरण गरिएको हो । 
सुदुरपश्चिम प्रदेशका भुमि व्यवस्था तथा कृषि सहकारी मन्त्री वीर बहादुर थापाले स्थानीयलाई घरको चाबी हस्तान्तरण गरेका हुन ।
सो क्रममा उनले मुक्त कमैयाहरुलाई सुरक्षीत आवश प्रदान गर्नका लागि प्रदेश सरकार लागि परेको भन्दै यसवर्ष पनि थप घर निर्माणका लागि बजेट विनियोजन गरिएको जानकारी दिए । उनले मुक्त कमैया, मुक्त कम्लहरीहरुको समस्या समाधानका लागि प्रदेश सरकारले यहाँका सबै स्थानीय तहका प्रमुखसङ्ग छलफल गरि आवश्यक गृहकार्य अगाडि बढाउने प्रतिबद्धता जनाए । 
कार्यक्रममा बर्दगोरिया गाउँपालिका अध्यक्ष कर्ण बहादुर कुवरले यहाँका भुमिहीन सुकुम्बासी ,मुक्त कम्लहरीको समस्या समाधानका लागि आफू अहोरात्र लागिपरेको भएपनी सरकारी कामकारबाहीको कारण केही ढिलाइ र समस्या हुँदै गएको बताए । 
उक्त मुक्त कमैयाका बस्तीमा रहेका ४२ घर घुरी मध्य १२ घर निर्माणका लागि ८० लाख ९४ हजार ५ सय ९४ रुपैयाँ खर्च भएको जनाइएको छ। सुरक्षित आवास परियोजना अन्तर्गत सो बस्तीमा घर निर्माणका लागि सुदूरपश्चिम प्रदेश सरकारको भूमि व्यवस्था कृषि तथा सहकारी मन्त्रालयले ३७ लाख ३३ हजार ३ सय ३२, ह्याबिट्याट फर ह्युमिनिटी र राष्ट्रिय दलित नेटवर्कले २७ लाख ७७ हजार २ सय ६२ खर्च गरेका छन् भने स्थानीयले १५ लाख ८४ हजार बराबरको श्रमदान गरेका छन् । प्रति घर ६ लाख ७४ हजार ५ सय ५० रुपैयाँ लागत लागेको जनाइएको छ ।
सुदुरपश्चिम प्रदेशको भुमि व्यवस्था तथा कृषि सहकारी मन्त्रालयका सचिब यज्ञराज जोशीको सभाध्यक्षतामा भएको कार्यक्रममा प्रदेश नीति तथा योजना आयोगका सचिव इनिश विक, बर्दगोरिया गाउँपालिका अध्यक्ष कर्ण बहादुर कुवर, उपाध्यक्ष गणेश राज गिरि लगाएको उपस्थिति थियो ।
पृथ्वीपुर । कैलालीको बर्दगोरिया गाउँपालिका वडा नम्बर ६ मा यसपर्ष पनि तिर्थ माघी मेला संचालन हुने भएको छ ।
बर्दगोरिया गाउँपालिका वडा नम्बर ६ को आर्थिक सहयोगमा रामजानकी सेवा समाज सुङरखालले गतवर्ष झै यसपटक पनि माघी मिलन तथा तिर्थ धार्मिक मेलाको आयोजना गर्ने भएको हो ।
आइतबार वडा अध्यक्ष रामकृष्ण डगौरा थारुको सभाध्यतामा बसेको बैठकले थारु भेषभुषा, भाषा कला सस्कृतिको सम्मान ,यसको पहिचानका साथै बर्दगोरिया ६ मा रहेको धार्मिक ,सास्कृतिक तथा पर्यटकीय क्षेत्र भक्तिनिया अस्थानको प्रवर्द्धनमा टेवा पुर्याउने मुख्य उदेश्यसहित मेला संचालन गर्ने निर्णय गरेको हो ।
बैठकले तिर्थ माघी मेला संचालनको लागि कलम बहादुर डगौराको अध्यक्षतामा १३ सदस्यीय उपभोक्ता समिति गठन गरिएको छ । जसको कोषाध्यक्षमा प्रावती देवि डगौरा, सचिबमा दुर्गा देवि सिंहलगाएत अन्य सदस्य रहेका छ्न ।
रामजानकी धार्मिक क्षेत्रको प्रचार प्रसार गर्ने र आन्तरिक पर्यटनको प्रवद्र्धन, आपसी सद्भावका निम्ति आयोजना गर्न लागिएको मेलाको विशेष गरी थारु समुदायको नयाँ बर्षका रुपमा लिदै आएको माघी पर्वको अवसर पारी माघ १ गते उद्घाटन गरिनेछ ।
बर्दगोरिया गाउँपालिका वडा नम्बर ६, स्थित रामजानकी मन्दिरको प्राङ्गण ,सुङरखालमा हुने कार्यक्रममा विभिन्न स्ट्ल ,राष्ट्रिय तथा स्थानीय कलाकारहरुका साथै विभिन्न झाकीहरुको समेत प्रस्तुती रहने छ ।
माघ १ गतेदेखि संचालन हुने मेला एक हप्तासम्म संचालन हुने जनाइएको छ ।
बौनिया । कैलालीको बर्दगोरिया गाउँपालिकाको विभिन्न स्थानबाट प्रहरीले अबैध रुपमा उत्पादन गरेकाे मदिरा बरामद गरि नस्ट गरेको छ । 
पालिकाका विभिन्न स्थानमा अवैध घरेलु मदिराको उत्पादन र बिक्रीवितरण भईरहेको जानकारी पश्चात् ईलाका प्रहरी कार्यालय सडकपुर बौनियाले खोजी कार्य तीब्र पारेको थियो ।
सोही कार्यअन्तर्गत पालिकाको वडा नम्बर ३ र वडा नम्बर ४ का बजार र गाउँ क्षेत्रका घर तथा होटेलबाट अबैध रुपमा उत्पादन गरिएको र बिक्रीवितरण गर्न राखिएको घरेलु मदिरा बरामद गरिएको प्रहरीले जनाएको छ । 
बिहिवार मात्रै प्रहरीले केही दिन अगाडि बरामद गरिएको दुई सय ७५ लिटर मदिरा नस्ट गरेको छ । वडा नम्बर १ कि वडा सदस्य तथा कार्यपालिका सदस्य सरस्वती विक, बौनिया बजार व्यवस्थापन समिति अध्यक्ष देव राज स्वार लगाएत सरोकारवाला निकायको रोहवरमा सो अबैध मदिरा नस्ट गरिएको ईलाका प्रहरी कार्यालय बौनियाका प्रहरी प्रमुख प्रहरी निरीक्षक वीर बहादुर थापाले जानकारी दिए ।
काठमाडौं । हरिशयनी एकादशीदेखि हरिबोधिनी एकादशीका दिनसम्म चार महिना विष्णुका भक्तले तुलसीको व्रत गरी विशेष पूजा गर्दै आएकामा आज दामोदरसँग विवाह गरी यो पर्व मनाइँदै छ ।
प्रत्येक वर्ष कार्तिक शुक्ल एकादशीका दिनमा भगवान् विष्णुको प्रतीकका रूपमा तुलसीको दामोदरसँग विवाह र विशेष पूजा गरी मनाइने हरिबोधिनी एकादशी पर्व आज मनाइँदै छ । आषाढ शुक्ल एकादशी अर्थात् हरिशयनी एकादशीका दिनमा क्षीरसागरमा सुतेका विष्णु ब्युँझिने भएकाले आजको एकादशीलाई हरिबोधिनी वा प्रवोधिनी एकादशी पनि भनिन्छ । हरिशयनी एकादशीका दिन घरघरमा रोपेर विशेष पूजा गरिएको तुलसीको मठमा गाईको गोबर र रातो माटोले पोतेर सिँगारी फूलमालाले सजाएर आज विवाह गरिन्छ ।
तुलसी विष्णुप्रिया भएकाले यस दिन तुलसीको दामोदरसँग विवाह गर्ने परम्परा बसेको हो । तुलसीको मठ नजिकै विष्णुको प्रतीकका रूपमा निगालाको लिंगा गाडेर विधिपूर्वक पूजा गरिन्छ । कार्तिक महिनाभर सबै देवदेवी तुलसीमै निवास गर्छन् भन्ने धार्मिक विश्वास छ ।
आदिकालदेखि पूजाको परम्परा बसेको तुलसीको महिमा वैज्ञानिक रूपमा पनि लाभदायक प्रमाणित भएको छ । यसैले तुलसीको मठ हुने घरलाई तीर्थ समान मानिन्छ । तुलसीको सुगन्धले दशदिशा पवित्र हुन्छ भनिन्छ । तुलसीको पूजा गरिएको घरमा यमदूत पनि पस्दैनन् भन्ने आस्थाका कारण हिन्दू धर्मावलम्बीले घरमा तुलसीको मठ बनाउँछन् ।तुलसीको पात, डाँठ वा फूलको रस रुघाखोकी र औलोलगायत रोगका लागि औषधि हुन्छ । यो रस शरीरमा लगाएर सुतेमा लामखुट्टेले टोक्दैन । तुलसीको मठ भएको स्थल वरपर विषालु सर्प पनि आउँदैन । मठको वरपर बहने हावाले विषालु कीटाणुलाई नष्ट गर्दछ । शरद् ऋतुभर सबै प्राणीका लागि तुलसीलाई महा औषधि मानिन्छ ।
तुलसीबाट बनेको चिया मानव शरीरमा रोग प्रतिरोधी क्षमता वृद्धि गर्न उपयुक्त मानिन्छ । 
कात्तिक महिनामा तुलसीको माला लगाउँदा र एक लाख तुलसी पत्र विष्णुलाई अर्पण गर्दा मनोकांक्षा पूरा हुन्छ भन्ने धार्मिक विश्वास छ । गरूड पुराणमा उल्लेख भएअनुसार यस महिनामा एउटा तुलसी पत्र भगवान् विष्णुलाई अर्पण गर्दा १० हजार गाई दान गरे बराबरको फल मिल्दछ ।
आजका दिन भगवान् विष्णुको मूर्तिलाई रथमा राखी यात्रा गराउने प्रचलन पनि छ । रात्रिमा ‘गोविन्द उठ्नुस् तपाईं सुते जगत् सुत्छ, तपाईं उठे जगत् उठ्छ’ भन्दै शङ्ख, घण्ट र ढोल बजाएर विष्णुलाई जगाउने गरिन्छ । यसको प्रतीकका रूपमा मानवका पाँच ज्ञानेन्द्रीय र पाँच कर्मेन्द्रीय एवं मन गरी ११ वटालाई जित्न उपयोग गरिने शास्त्रीय मान्यता छ ।
किसानले उखुको बोट मठमा गाड्छन् । आजको दिन अन्न खान नहुने भएकाले सखरखन्ड, पिँडालु र वन तरुल उसिनेर फलाहार गरिन्छ । यसरी व्रत गरेमा पापको नाश भई पुण्य वृद्धि हुने र मोक्ष प्राप्ति हुन्छ भन्ने धार्मिक विश्वास छ । ठूलो एकादशी पनि भनिने आजको एकादशी व्रतले हजार अश्वमेध यज्ञ तथा राजसूय यज्ञ गरे बराबरको फल पाइने शास्त्रीय मान्यता छ । आजै देशभरका नारायण मन्दिरमा विशेष पूजा गरी यो पर्व मनाइन्छ ।
बर्दगोरिया । कैलालीको बर्दगोरियामा संचालित दोस्रो पालिका स्तरीय मैत्रीपूर्ण फुटबल प्रतियोगिताको उपाधी बौनिया बजारका ब्यापारीको टीमले उचालेको छ । शनिबार भएको फाइनल खेलमा बर्दगोरिया गाउँपालिका कर्मचारी टीमलाई पेनाल्टी सुट आउटमा पराजित गर्दै प्रतियोगिताको उपाधी उचालेको हो ।
पारस्परिक सदभाव, आपसी सहयोग र मित्रताका लागि खेल” भन्ने मूल नाराका साथ बर्दगोरिया पत्रकार मञ्चको आयोजनामा भएको मैत्रीपूर्ण फुटबल प्रतियोगिताको शनिबार फाइनल खेलमा निर्धारित समयमा दुबै टीमले गोल गर्न नसकेपछि खेल पेनाल्टी सुट आउटमा पुगेको हो ।
पेनाल्टी सुट आउटमा बौनिया बजारका व्यापारीले बर्दगोरिया कर्मचारी टीमलाई ३-२ ले पराजित गर्दै प्रतियोगिताको उपाधी उचाल्यो । यस अघि सेमिफाइनलमा आयोजक बर्दगोरिया पत्रकार मञ्चको टीमलाई १-० ले पराजित गर्दै कर्मचारी टीम फाइनलमा पुगेको थियो ।
यसपटक प्रतियोगिताको उपबिजेता बर्दगोरिया कर्मचारी टीम यस अघिको मैत्रीपूर्ण खेलको बिजेता समूह हो ।
प्रतियोगिताको बिजेता टीमले ट्रफी, प्रमाणपत्र र खसी पाएको छ भने उप-बिजेता टीमले ट्रफी ,प्रमाणपत्र र बोका पाउन सफल भएको छ ।
प्रतियोगिताको बिजेता उप-बिजेता दुबै टीमलाई पालिका उपाध्यक्ष गणेश राज गिरिले पुरस्कार वितरण गरेका छ्न ।
प्रतियोगितामा स्थानीय व्यापारी, कर्मचारी, बित्तीय संस्थामा आबद्ध कर्मचारी ,स्थानीय शिक्षक लगायत ८ वटा टीमहरुको सहभागिता रहेको थियो । बर्दगोरिया पत्रकार मञ्चले गतवर्ष देखि मैत्रीपूर्ण फुटबल खेल खेलाउँदै आएको छ ।
काठमाडौं । हाल देशभर पश्चिमी वायुको प्रभाव रहनुका साथै स्थानीय वायुको पनि आंशिक प्रभाव रहेको छ। हाल कोशी प्रदेश,बाग्मती प्रदेश लुम्बिनी प्रदेशका एक-दुई स्थानमा मेघ गर्जन/चट्याङ्ग सहित हल्का वर्षाको भइरहेको छ।
कर्णाली र सुदूरपश्चिम प्रदेशका पहाडी भू-भागका थोरै स्थानहरूमा तथा कोशी प्रदेश, बागमती प्रदेश, गण्डकी प्रदेशका पहाडी भू-भागमा एक-दुई स्थानमा मेघ गर्जन/चट्याङ्ग सहित हल्का देखि मध्यम वर्षाको सम्भावना रहेको छ। देशका उच्च पहाडी तथा हिमाली भू-भागका एक-दुई स्थानमा हल्का हिमपातको समेत सम्भावना रहेको छ।
देशका उच्च पहाडी तथा हिमाली भू-भागका एक-दुई स्थानमा हल्का हिमपातको समेत सम्भावना रहेकोले कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्न सक्ने हुनाले आवश्यक सतर्कता अपनाउनु हुन महाशाखाले अनुरोध गरेको छ।
काठमाडौ । हाल कोसी, मधेस, बागमती, गण्डकी र लुम्बिनी प्रदेशमा मनसुनी वायुको प्रभाव छ। त्यसैगरी कर्णाली र सुदूरपश्चिम प्रदेशमा पश्चिमी वायुको प्रभाव छ। देशको पूर्वी र मध्य भागमा भने भारतको बिहार तथा आसपासको क्षेत्रमा रहेको न्यून चापीय प्रणालीको आंशिक प्रभाव रहेको मौसम पूर्वानुमान महाशाखाले जनाएको छ।यतिबेला (मंगलबार बिहान) देशका पहाडी भूभागको मौसम आंशिक बदली छ। साथै कोसी र बागमती प्रदेशका एकदुई स्थानमा अहिले हल्का वर्षा भैरहेको छ। आज दिउँसो पनि कोसी, मधेस, बागमती र गण्डकी प्रदेशमा आंशिकदेखि साधारणतया बदली रहने अनुमान छ। बाँकी भूभागमा आंशिक बदलीदेखि मौसम मुख्यतया सफा रहने महाशाखाले जनाएको छ। कोसी, मधेस, बागमती र गण्डकी प्रदेशका थोरै स्थान तथा बाँकी प्रदेशका पहाडी भूभागका एकदुई स्थानमा दिउँसो मेघ गर्जन र चट्याङसहित हल्कादेखि मध्यम वर्षाको सम्भावना रहेको छ।
आज राति पनि कोसी, मधेस, बागमती र गण्डकी प्रदेशमा आंशिकदेखि साधारणतया बदली रहने अनुमान महाशाखाले गरेको छ। बाँकी भूभागमा आंशिक बदलीदेखि मौसम मुख्यतया सफा रहने छ। कोसी, मधेस र बागमती प्रदेशका थोरै स्थान तथा गण्डकी प्रदेशका एकदुई स्थानमा राति पनि मेघ गर्जन र चट्याङसहित हल्कादेखि मध्यम वर्षाको सम्भावना रहेको महाशाखाले मंगलबार बिहान ६ बजे जारी गरेको बुलेटिनमा उल्लेख छ।कस्तो होला बुधबार र बिहीबारको मौसम?
२०८१ असोज २३ गते बुधबार
दिउँसोː कोसी र मधेस प्रदेश लगायत देशका पहाडी भूभागमा आंशिकदेखि साधारणतया बदली रही बाँकी भूभागमा आंशिक बदलीदेखि मौसम मुख्यतया सफा रहने छ। कोसी, बागमती र गण्डकी प्रदेशका थोरै स्थान तथा बाँकी प्रदेशका एकदुई स्थानमा मेघ गर्जन र चट्याङसहित हल्कादेखि मध्यम वर्षाको सम्भावना रहेको छ।रातिː कोसी र मधेस प्रदेश लगायत बागमती र गण्डकी प्रदेशका पहाडी भूभागमा आंशिकदेखि साधारणतया बदली रही बाँकी भूभागमा आंशिक बदलीदेखि मौसम मुख्यतया सफा रहने छ। कोसी प्रदेशका थोरै स्थान तथा बाँकी प्रदेशका पहाडी भूभागका एकदुई मेघ गर्जन र चट्याङसहित हल्कादेखि मध्यम वर्षाको सम्भावना रहेको छ।
२०८१ असोज २४ गते बिहिबार
दिउँसोː कोसी र मधेस प्रदेशमा आंशिकदेखि साधारणतया बदली रही बाँकी भूभागमा आंशिक बदलीदेखि मौसम मुख्यतया सफा रहने छ। कोसी प्रदेशका थोरै स्थान तथा मधेस प्रदेश लगायत बाँकी प्रदेशका पहाडी भूभागका एकदुई स्थानमा मेघ गर्जन र चट्याङसहित हल्कादेखि मध्यम वर्षाको सम्भावना रहेको छ।
रातिː कोसी प्रदेश लगायत बागमती र गण्डकी प्रदेशका पहाडी भूभागमा आंशिकदेखि साधारणतया बदली रही बाँकी भूभागमा आंशिक बदलीदेखि मौसम मुख्यतया सफा रहने छ। कोसी प्रदेशका थोरै स्थान तथा बाँकी प्रदेशका पहाडी भूभागका एकदुई स्थानमा मेघ गर्जन र चट्याङसहित हल्कादेखि मध्यम वर्षाको सम्भावना रहेको छ।
बर्दगोरिया । कैलालीको बर्दगोरिया गाउँपालिका वडा नम्बर १ स्थित बौनिया बजारमा सोमबारदेखि बौनिया स्केटिङ्ग पार्क संचालनमा आएको छ । पार्कको गाउँपालिका उपाध्यक्ष गणेश राज गिरिले एक कार्यक्रमका बिच उदघाटन गर्नु भएको छ । पछिल्लो समय बालबालिकामा मोवाइलको लत बढदै गएकोले उनीहरुलाई खेलतर्फ आकर्षित गर्नका लागि स्केटिङ्ग पार्क संचालनमा ल्याइएको प्रोपाइटर हरिकृष्ण कठरियाले बताएका छ्न । नेपालीहरुको महानपर्व बिजया दशमी तथा शुभ दिपावलीको अवसर पारी सुभारम्भ गरिएको बौनिया स्केटिङ एण्ड खेल संसारमा दसैं अवधिभर विशेष छुटको प्याकेज रहेको बौनिया स्केटिङ एण्ड खेल संसारका एक प्रोप्राइटर कठरियाले जानकारी दिएका छन् ।हरिकृष्ण कठरिया र अबिनाश चौधरीको संयुक्त लगानीमा संचालित बौनिया स्केटिङ एण्ड खेल संसारले स्केट पारखीको लागि विभिन्न सुबिधाहरु थप्दै र ब्यवस्थित बनाउदै लैजाने प्रोपराइटर कठरियाले बताएका छन् ।कठरियाका अनुसार सुभारम्भको अवसरमा १०० रुपैयामा स्केटिङ खेल शुल्क तथा मोजाको शुल्क ५० रुपैयाँ तोकिएको छ । उनकाअनुसार यस खेलले बालबालिकामा शारीरिक स्फुर्ती बढने र शारीरिक तथा मानसिक स्त्तर वृद्धि विकासमा टेवा पुर्याउने बिश्वास राखिएको छ ।कठरियाका अनुसार बौनियामा स्केटिङ्ग पार्क संचालन गर्नुको मुख्य उदेश्य नै यहाका बालबालिकाहरु खेल खेल्नका लागी बाहिर जानुपर्ने अवस्थालाई मध्यनजर गर्दै अभिभावकहरुको रुचि र माग अनुसार नै यो पार्क संचालनमा ल्याईएको हो ।खेल सिकाउनका लागि अनुभवी प्रशिक्षक संगै सम्भाबित दुर्घटनालाई ख्याल गरी सुरक्षाका सामग्री प्रयोगको ब्यवस्था गरिएको संचालक कठरियाले बताए ।स्केटिङ्ग पार्कको उद्घाटन गर्दै पालिका उपाध्यक्ष गणेश राज गिरिले बौनिया बजारमा स्केटिङ्ग पार्क संचालन हुनु समग्र बर्दगोरियाबासीको लागि खुसीको बिषय भएको बताए । उनले यो खेल नया पिढीका लागि अति आवश्यक भएकोले बालबालिकाहरुलाई यस खेलप्रति रुचि देखाउन आग्रह गरे ।
उद्घाटन कार्यक्रममा बर्दगोरिया गाउँपालिका वडा नम्बर १ का वडा अध्यक्ष मिथुन गौतम ,वडा नम्बर २ का वडा अध्यक्ष गोविन्द विक, बौनिया बजार व्यवस्थापन समितिका अध्यक्ष देवराज स्वार, इलाका प्रहरी कार्यालय बौनियाका प्रहरी प्रमुख वीर बहादुर थापा लगाएतको उपस्थिति रहेको थियो ।
बर्दगोरिया । नेकपा माओवादी केन्द्रको भातृ संगठन थारु राष्ट्रिय मुक्ति मोर्चा नेपाल बर्दगोरिया गाउँपालिकाको दोस्रो सम्मेलन सम्पन्न भएको छ । मंगलबार बर्दगोरिया गाउँपालिका वडा नम्बर ६ को पृथ्वीपुरमा सम्पन्न दोस्रो सम्मेलनले लाल बहादुर चौधरीको अध्यक्षतामा १७ सदस्यीय नयाँ कमिटी सर्वसम्मत चयन गरेको छ । मोर्चाका बर्दगोरिया उपाध्यक्ष भोजराज चौधरीको सभाध्यतामा सम्पन्न भएको सम्मेलनको प्रमुख अतिथिको रूपमा नेकपा माओवादी केन्द्रका केन्द्रिय सदस्य तथा पुर्व संविधान सभा सदस्य कृष्ण कुमार चौधरी (कुण्डन) रहेका थिए ।
सम्मेलनबाट उपाध्यक्षमा प्रेमा कुमारी चौधरी(वडा नम्बर ६),भोजराज डगौरा (वडा नम्बर ४), राजेश चौधरी (वडा नम्बर ५), कोषाध्यक्षमा उषादेवी कठरिया (वडा नम्बर १) ,सचिबमा राजकुमार चौधरी (वडा नम्बर ६) सहसचिवमा रिता महत्तो थारु (वडा नम्बर १) रहेका छ्न ।यसैगरी सदस्यतर्फ आशाराम चौधरी (वडा नम्बर ६) ,रेखादेवि कठरिया (वडा नम्बर १) ,किसिम लाल डगौरा (वडा नम्बर १) लक्षमण डगौरा (वडा नम्बर ६) ,राजु चौधरी (वडा नम्बर ३) सुनिता चौधरी (वडा नम्बर ४) अनिता देवि चौधरी (वडा नम्बर ५) ,दिलिप सिंह कठरिया (वडा नम्बर २) ,कलम बहादुर डगौरा (वडा नम्बर ६) रामकृष्ण थारु (वडा नम्बर २) बाट सर्वसम्मत चयन भएका छ्न ।
सम्मेलनलाई सम्बोधन गर्दै नेकपा माओवादी केन्द्रका केन्द्रिय सदस्य तथा पुर्व संविधान सभा सदस्य कृष्ण कुमार चौधरी (कुण्डन) ले थारु समुदायको हक अधिकारका स्थापित गर्नका लागि माओवादी केन्द्रले ठूलो भुमिका त्याग र बलिदान गरेको भन्दै अझैपनि दिगो रूपमा सिङ्गो थारु समुदायको अधिकार स्थापितको प्रत्याभूति पुर्ण रूपमा गराउन नसकिएको अबस्था देखिदै आएको हुँदा सबैको साथ सहयोगको अपरिहार्यता आवश्यक रहेको बताए ।
कार्यक्रममा नेकपा माओवादी केन्द्रका केन्द्रिय सदस्य तथा सुदुरपश्चिम प्रदेश कमिटीका सचिबालय सदस्य बिर्ख बहादुर महत्तरा, नेकपा माओवादी केन्द्र सुदुरपश्चिम प्रदेश कमिटीका सचिबालय सदस्य गणेश राज गिरि, रुपक सुनार, प्रदेश कमिटी सदस्य रामकृष्ण डगौरा थारु (रन्जित ),नेकपा माओवादी केन्द्र सुदुरपश्चिम कमिटी सदस्य नाथुराम थारु, दल बहादुर तिरुवा तथा लगाएतको उपस्थिति रहेको थियो ।
असोज १५,धनगढी । कैलालीमा मोटरसाइकल दुर्घटना हुँदा दुई युवकको मृत्यु भएको छ।पूर्वपश्चिम महेन्द्र राजमार्गअन्तर्गत कैलालीको गौरीगंगा नगरपालिका-१ सोमबार राति ९ बजेतिर दुई मोटरसाइकल आपसमा ठोकिएका हुन्।
जिल्ला प्रहरी कार्यालय कैलालीका डीएसपी कवीन्द्र बोहराका अनुसार दुर्घटनामा कैलालीको जानकी गाउँपालिका-८ का २० वर्षीय निर्मल चौधरी र कञ्चनपुरको शुक्लाफाँटा नगरपालिका-७ का २६ वर्षीय चिरञ्जीवी मल्लको मृत्यु भएको हो।
मल्ल दसैँ मनाउन काठमाडौँबाट घर फर्किँदै थिए। तर दुर्घटनामा परेर बाटोमै ज्यान गुमाए।
मोटरसाइकल दुर्घटनामा गम्भीर घाइते भएका मल्ल र चौधरीलाई उपचारका लागि धनगढीको नवजीवन अस्पताल पुर्याउँदा चिकित्सकले मृत घोषणा गरेका थिए। मृतक दुवैको शव अहिले सेती प्रादेशिक अस्पतालमा राखिएको छ।
