रमेश बम, बौनिया (कैलाली)।
कैलालीको बर्दगोरिया गाउँपालिकामा लागु औषध विरुद्ध प्रहरीले सचेतनामुकल कार्यक्रम थालेको छ । विशेष गरी पछिल्लो समय बढ्दो लागु औषध दुर्व्यसनी तथा दुरुपयोग र ओसारपसार रोकथाम र नियन्त्रणमा लिन इलाका प्रहरी कार्यालय सडकपुर बौनियाले सचेतनामुलक कार्यक्रम थालेको हो ।
लागू औषध नियन्त्रणका लागि प्रहरीले यहाँका सरोकारवाला निकाय तथा स्थानीयसंग परामर्श र साझेदारीलगाएतका कार्यक्रम गर्दै आएको कार्यालयका प्रहरी सहायक निरीक्षक नमराज भट्टले बताउनुभयो । यसैक्रमा मंगलबार इलाका प्रहरी कार्यालय बौनिया परिसरमा स्थानीयसंघ लागू औषध दुर्व्यसनी नियन्त्रण, यसबाट शारीरिक तथा मानसिक असरका साथै कानुनी कारबाही बारे सचेतिकरण कार्यक्रम गरिएको छ ।
कार्यक्रममा प्रहरी सहायक निरीक्षक भट्टले पछिल्लो समय युवापुस्ता बढी लागू औषध सेवन, यसको ओसारपसारमा सक्रिय बनेको बताउदै यसप्रति सवै सचेत हुन आवश्यक रहेको बताउनुभयो । उहाँले लागू औषध दुर्व्यसनी रोक्न र यसको ओसारपसार नियन्त्रण गर्न प्रहरी बढी सक्रिय बनेको बताउदै अभिभावकसमेत जिम्मेवार बन्नुपर्ने बताउनुभयो ।
लागु औषध दुव्र्यसनमा फसेसँगै आर्थिक जोहो गर्नकै लागि कतिपयले लुटपाट ,चोरीतस्करी जस्ता पेशामासमेत युवापुस्ता समाहित हुने गरेको पाइएको उहाँले बताउनुभयो ।
