अछाम। अछाममा निरन्तरको वर्षापछि आएको पहिरोले घर पुरिँदा एकै परिवारका तीन जनाको मृत्यु भएको छ ।
जिल्लाको तुर्माखाँद गाउँपालिका–२ भुलुका अमर विष्टको घर पुरिँदा घरमा सुतिरहेका तीन जनाको मृत्यु भएको हो ।
मृत्यु हुनेमा अमर बिष्टका भाइ विरेन्द्र विष्ट ,छोरा संविधान विष्ट र बुहारी हरिकला विष्ट रहेको प्रहरीले जनाएको छ ।
पहिरोमा पुरिएर एक जना घाइते भएका छन् । उनलाई उद्धार गरी स्थानीय स्वास्थ्य संस्थामा उपचारका लागि लगिएको छ ।
तुर्माखाँद गाउँपालिकाका अध्यक्ष डम्बर बिसीले वर्षापछि घर माथिबाट आएको पहिरोका कारण दुःखद घटना भएको बताउनुभयो ।
अहिले स्थानीय, जनप्रतिनिधि, प्रहरीको सक्रियतामा उद्धारको काम भइरहेको प्रहरीले जनाएको छ । गए राति १ः०० बजेतिर पहिरो खसेको थियो । ओछ्यानमा सुतिरहेकाहरू पहिरोमा पुरिएका थिए ।
घटनाको थप विवरण आउन बाँकी छ ।
