बर्दगोरिया । कोरोना भाइरस (कोभिड–१९ )खोपका लागि समुदाय परिचालन परियोजना कार्यान्वयनका सन्दर्भमा बर्दगोरियामा सरोकारवाला निकायसंग छलफल भएको छ ।
कोभिड -१९ खोपको कभरेज सत प्रतिशत पुर्याउने नेपाल सरकारको योजनालाई सहयोग गर्ने लक्ष्यका साथ ब्याकवार्ड सोसाइटी एजुकेशन (बेस) ले बर्दगोरिया गाउँपालिकासहित ७ स्थानीय तहमा समुदाय परिचालन परियोजनाको कार्य गर्नेछ । सोही अनुरुप बुधबार बर्दगोरियामा छलफल गरिएको हो ।
जिल्ला स्वास्थ्य कार्यालय कैलालीको आर्थिक सहयोग , जिआईजेडको स्वास्थ्य क्षेत्र कार्यक्रम अन्तर्गत बेसले कैलालीको बर्दगोरिया, जानकी , लम्कीचुहा ,टीकापुर, भजनी ,जोशीपुर र मोहन्यालमा कोभिड–१९ खोपका लागि समुदाय परिचालन परियोजनाको काम गर्ने जनाईइएको छ ।
कार्यक्रम अन्तर्गत यी स्थानीय तहमा महिला सामुदायिक स्वास्थ्य स्वयंसेवीकाहरु संग समन्वय गरि कोभिड–१९ विरुद्धको खोप अभियान बारे समुदायलाई जानकारी गराउने, परिचालन गर्ने र गतिविधिहरुलाई तिब्र पार्ने उद्देश्य राखिएको ब्याकवार्ड सोसाइटी एजुकेशन (बेस) का कार्यक्रम संयोजक लक्ष्मण चौधरीले जानकारी दिए ।
चौधरीकाअनुसार उक्त परियोजनाको कार्यक्रम कार्यान्वयन पश्चात समुदायमा कोभिड–१९ को खोप कभरेजमा वृद्धि हुने अपेक्षा गरिएको छ् । जुलाई २५ तारिखदेखि लागु भएको परियोजनाले यसै वर्षको डिसेम्बर १० तारिखसम्म काम गर्नेछ । यसैगरी पालिका स्तरीय परियोजना जानकारी तथा शुभारम्भ बैठक, स्थानीय पालिकाहरुमा परियोजनाको जानकारी तथा कार्ययोजना निर्माण बैठक सञ्चालन पश्चात् महिला स्वास्थ्य स्वंयम् सेविकाहरुलाई अभिमुखीकरण, मासिक समीक्षा बैठक, कोभिड १९ को जानकारी तथा भ्याक्सिनको बारेमा संचारमाध्यमबाट प्रचारप्रसार, समुदाय परिचालन गतिविधिहरु तथा प्रचार–प्रसार, खोप कार्यमा सहयोग, नियमित अनुगमन र सुपरिवेक्षण तथा पूर्ण कोभिड १९ भ्याक्सिन पालिकामा सहयोग लगाएतका क्रियाकलाप परियोजनाले गर्ने कार्यक्रम संयोजक चौधरीले बताए ।
बर्दगोरिया गाउँपालिका उपाध्यक्ष गणेश राज गिरिको अध्यक्षतामा भएको कार्यक्रममा जनप्रतिनिधी, स्वास्थ्य शाखा र पालिका भित्रका स्वास्थ्य संस्थाहरुका प्रतिनिधिहरु, सञ्चारकर्मी लगाएतको उपस्थिति रहेको थियो ।
कार्यक्रममा कोभिड १९ विरुद्धको खोपको अवस्था, खोप लगाएका व्यक्तिहरुको तथ्यांक र खोप लगाउन बाँकी नागरिकहरुलाई खोप प्रदान गर्ने रणनीतिका बारेमा छलफल समेत गरिएको छ् ।
कार्यक्रममा जिल्लाभर लक्षित उमेर समूहका नागरिकहरु मध्ये पहिलो मात्रा खोप ९३.५ प्रतिशत, दोस्रो मात्रा खोप ७९.४ प्रतिशत र तेस्रो मात्रा खोप ३६.१ प्रतिशतलाई प्रदान गरिएको जानकारी गराईएको थियो । जसमा बर्दगोरिया गाउँपालिकामा पहिलो मात्रा खोप लाउने ८८.३ प्रतिशत,दोस्रो मात्रा खोप लाउने ७४.२ प्रतिशत र बुस्टर डोज लाउने ३२.७ प्रतिशत रहेको बारे जानकारी गराइएको छ ।
कार्यक्रमको संचालन बर्दगोरिया गाउँपालिका स्वास्थ्य शाखा प्रमुख नृप विष्टले गरेका थिए ।