बर्दगोरिया । कैलालीको बर्दगोरिया गाउँपालिका वडा नम्बर ६ मा एकदिने बृहत रक्तदान तथा १ दिवसीय निःशुल्क आँखा शिविर सम्पन्न भएको छ । बर्दगोरिया इभेण्ट एण्ड मार्केटिङ प्रालिको आयोजना तथा वडा नम्बर ६ को समन्वयमा शुक्रबार सो कार्यक्रम सम्पन्न भएको हो ।
रक्तदान जीवनदान भन्ने मूल नाराका साथ भएको शिबिर मार्फत ३ सय बढीले सेवा लिएको आयोजकले जनाएको छ ।
नेपाल रेडक्रस सोसाईटी टीकापुर उपशाखाको प्राविधिक सहयोगमा रक्तदान कार्यक्रममा विभिन्न सामाजिक व्यक्तिले रक्तदान गरेका छन् । यस्तै श्री कृष्ण आँखा अस्पताल टीकापुरको प्राविधिक सहयोगमा पालिका भित्र तथा अन्य पालिका बाट आएका आँखा सम्बन्धी बिरामीहरूलाई चेकजाँच गरी सेवा दिएको हो ।
कार्यक्रमका प्रमुख अतिथि बर्दगोरिया गाउँपालिका उपाध्यक्ष गणेश राज गिरी “लालादिप”ले समाजमा भइरहने यस्ता सामाजिक काम गर्ने संघ-संस्थाहरुलाई पालिकाले समन्वय गरी यस्ता थुप्रै कार्यक्रम गर्न सहयोग गर्नु पर्ने बताए ।
उपाध्यक्ष गिरिले पालिकाले सबै काम आफैं गर्न नसक्ने र विभिन्न कार्यक्रम गर्दा यस्ता सामाजिक कार्यक्रम गर्ने संस्था सँग समन्वय सहकार्य गरेर कार्यक्रम गर्दा समाजमा थुप्रै राम्रा काम गर्न सकिने बताए ।
कार्यक्रममा बर्दगोरिया गाउँपालिका वडा नम्बर ६ का वडा अध्यक्ष रामकृष्ण डगौरा थारु ( रन्जित) ले गाउँ टोलमै भइरहने यश प्रकारका सामाजिक कार्यले सहज रूपमा सेवा लिन पाउने बताए । उनले आगामी दिनमा समेत यस्ता स्वास्थ्य तथा सामाजिक सुरक्षाका कार्यक्रम हुनुपर्ने बताए ।
