धनगढी । सुदूरपश्चिम प्रदेशमा सत्तारूढ गठबन्धनको सहजै प्रदेश सरकार गठन हुने प्रदेश सभा सदस्यको सङ्ख्या पुग्ने भएको छ।
५३ सदस्यीय सुदूरपश्चिम सभाका प्रत्यक्ष ३२ मध्ये ३० क्षेत्रको परिणाम सार्वजनिक भएको छ। सरकार बनाउन २७ प्रदेश सभा सदस्य आवश्यक पर्नेमा अहिलेसम्म गठबन्धनका दलहरूले प्रत्यक्षका २० सिट जितेका छन्। 
समानुपातिकमा नेपाली कांग्रेसले कम्तीमा सात र नेकपा (माओवादी केन्द्र)ले तीन प्रदेश सभा सदस्य पाउने अपेक्षा छ। अघिल्लो पटकको प्रदेश सभामा नेपाली कांग्रेसले आठ र माओवादीले चार समानुपातिक सिट पाएको थियो। प्रत्यक्षका ३० क्षेत्रको परिणामअनुसार सत्तारूढ गठबन्धनमध्येको नेपाली कांग्रेसले ११, नेकपा (माओवादी केन्द्र)ले आठ र नेकपा (एकीकृत समाजवादी)ले दुई सिट जितेका छन्। अझै बाजुराका दुई क्षेत्रमा भने गणना भएको छैन। एउटा मतदान केन्द्रका शनिबार मतदान भएको छ। त्यहाँ मतदान सकिएपछि गणना हुने अपेक्षा गरिएको छ।
सङ्घीय सरकार अहिलेकै गठबन्धनको बनेन र प्रदेशमा त्यसको प्रभाव प(यो भने सुदूरपश्चिम प्रदेश सरकार बनाउनका लागि नेपाली कांग्रेसबाहेकका सबै दल नेकपा (एकीकृत माओवादी), नेकपा (एमाले), नागरिक उन्मुक्ति पार्टी र नेकपा (एकीकृत समाजवादी) मिल्नुपर्ने हुन्छ। प्रत्यक्षमा नेकपा (एकीकृत माओवादी)ले जितेको आठ, नेकपा (एमाले) तीन, नागरिक उन्मुक्ति पार्टीका पाँच र नेकपा (एकीकृत समाजवादी) दुई मिल्नुपर्ने हुन्छ।
ती दल मिल्दा प्रत्यक्षमा १८ सिट पुग्छ। समानुपातिक सिटले नेपाली कांग्रेसबाहेकका दलको सरकार बनाउन मिल्ले सङ्ख्या पुग्ने देखिन्छ। २०७४ मा समानुपातिकमा आठ सिट पाएको नेकपा (एमाले)ले सात सिट पाउने अपेक्षा गरिएको छ। अघिल्लो पटक चार सिट पाएको नेकपा (माओवादी केन्द्र)ले यस पटक तीन सिट पाउने विश्वास गरिएको छ।
