बर्दगोरिया । वर्षौपछि स्वामित्वमा आएपछि कैलालीको बर्दगोरिया गाउँपालिका वडा नम्बर १ मा रहेको बालकन्या माध्यमिक विद्यालयको अतिक्रमित जग्गामा संरक्षणको कार्य अगाडि बढाइएको छ ।स्थानीय नदी, प्रस्तावित काडा सामुदायिक वन र स्थानीयको अतिक्रमणको चपेटामा परेको विद्यालयको करिब १० विगाहा जग्गा विद्यालयकै स्वामित्वमा ल्याई नाप नक्साङ्कन गरि संरक्षणको कार्य सुरु गरिएको विद्यालय व्यवस्थापन समितिका अध्यक्ष हेमन्त जैशी (खतिवडा)ले बताए ।
अध्यक्ष जैशीकाअनुसार विद्यालय स्थापनाको समय २०४६ सालमा साविकको कट्टिपुर खल्लामा रहेको विद्यालयको करिब १० बिगाहा जग्गालाई संरक्षण गरि प्रयोगमा ल्याउने उदेश्यका साथ काम अगाडि बढाइएको छ ।
अतिक्रमित सरकारी तथा सार्वजनिक जग्गा सरकारको मातहतमा ल्याउने योजनास्वरुप बालकन्या माविको जग्गा विद्यालयकै नियन्त्रणमा ल्याउन यसअघि यहाँका सरोकारवाला निकायले खोजीकार्य गरेका थिए ।
विद्यालय व्यवस्थापन समितिका अध्यक्ष जैशीले दिएको जानकारीअनुसार विद्यालय स्थापनाको समयमा साविकको दोदोधरा गाविसबाट कट्टिपुर खल्लामा १० बिगाहा जग्गा विद्यालयले (भोगचलल) प्रयोग गर्न पाउने भनी निर्णय भएको प्रमाण भेटिएको थियो । सोही प्रमाणका आधारमा विद्यालयको जग्गा विद्यालयकै स्वामित्वमा ल्याइउने प्रक्रिया अगाडि बढाइएको थियो ।
जसअनुसार २०८० भाद्र २६ गते बसेको सर्वपक्षीय भेलाले अतिक्रमीत जग्गा विद्यालयलाई नै दिने र २०६२/६३ मा भएको सीमा निर्धारणको निर्णयलाई आधार मानी कार्य अगाडि बढाउने सहमति भएको थियो । सो सहमति पश्चात् विद्यालयको अतिक्रमित जग्गाको सिमा निर्धारणको कार्य अगाडि बढाइएको थियो ।
वर्षौपछि विद्यालयको अतिक्रमित जग्गा विद्यालयको नियन्त्रणमा ल्याइएपछि अहिले विद्यालयको सो जग्गामा घेरबारको काम सुरु गरिनुका साथै स्थानीय काडा नदीको अतिक्रमबाट जोगाउन तटबन्ध निर्माणको कार्य थालिएको छ ।स्थानीयकाअनुसार प्राथमिक तहबाट स्कुल संचालनमा रहेको थियो । तत्पस्चात स्थानीय काडानदिको कटानबाट विद्यालय संचालनको अबस्था प्रभावित बनेपछि त्यहाँबाट कट्टिपुर गाउँमा सारिएको थियो ।