बौनिया, कैलाली । कैलालीको बर्दगोरिया गाउँपालिका वडा नम्बर १ सडकपुर बौनिया बजार स्थित पुर्वपश्चिम महेन्द्र राजमार्गमा वर्षाका कारण सडकमा परेको खाल्डाखुल्डी नपुरिदा दुर्घटनाको जोखिम बढेको छ ।
बर्दगोरिया गाउँपालिकाको मुख्य बजार क्षेत्रमै वर्षाका कारण सडकमा परेको ठुलाठुला खाल्डाखुल्डी नपुरिदा सवारी दुर्घटनाको जोखिम बढेको हो ।
यहाँका स्थानीय भन्छन् – अन्य पालिकाको तुलनामा हाम्रो गाउँपालिका स्रोत साधनने भरिपुर्ण छ । त्यसैको उपयोग गरि मुख्य सडकमै परेको ठूलो खाल्डाखुल्डी मर्मत गरिदिएको भए आवतजावतमा सहज हुने थियो । र दुर्घटनाको जोखिम हुने थिएन ।
पालिकाकै मुटु मानिने मुख्य व्यापारीक क्षेत्र बौनिया बजारमा बनेको सडकको यो दुर्दशाले सवारी चालक, यात्रु तथा बजार आवातजावत गर्ने सवैलाई सास्ती पारेको छ ।
वर्षाका कारण मुख्य राजमार्गमै परेको खाल्डाखुल्डीले दैनिक आवातजावत गर्नेलाई सकस तुल्याएको छ । विगत केहीदिन अगाडि देखि निरन्तर परिरहेको पानीका कारण सडकमा परेका खाल्डाखुल्डीले जोखिम बढाएको छ ।
सोही राजमार्ग भएर केन्द्रीय राजधानी काठमाडौंसहित मुलुकका विभिन्न जिल्लाका लागि दैनिक रुपमा हजारौंको संख्यामा साना तथा ठूला सवारी साधन गुड्छन्। अति संबेदनसिल मानिने र सवारी साधनको बढी चाप हुने राजमार्गमा यस्तो लापरबाही हुनु दुखद भएको भन्दै स्थानीय सरकार तथा सरोकारवाला निकायले यसको तत्काल मर्मत गर्नुपर्ने स्थानीयको भनाई छ ।
सवारी साधनको अत्यन्तै बढी चाप हुने यस खण्डमा खाल्डाखुल्डीका कारण तीव्र गतिमा गुडिरहेका सवारी साधन दुर्घटनामा पर्ने जोखिम बढेको छ भने सडकमा हिड्ने पैदल यात्रुको शरीरमा हिलाम्मे पानी छापिने गरेको छ ।
