रमेश बम, बौनिया(कैलाली)। चाडपर्व नजिँदै जाँदा ईलाका प्रहरी कार्यालय सडकपुर बौनिया,कैलालीले विशेष सुरक्षा रणनीति अपनाएको छ। मुख्यगरी नेपालीहरुको महान चाड दशै, तिहारको समयमा हुन सक्ने चोरी, लुटपाटलगायत विभिन्न आपराधिक गतिविधिलाई मध्यनजर गर्दै प्रहरीले विशेष सुरक्षा योजना तयार पारेको हो ।
ईलाका प्रहरी कार्यालय सडकपुर बौनियाका प्रहरी नायव निरीक्षक बिष्णु बहादुर महतराकाअनुसार विगतका चाडपर्वमा जस्तै अवाक्षनीय अपराधिक गतिविधि, चोरी, तथा लुटपाट र सवारी दुर्घटनालाई मध्यनजर गर्दै प्रहरीले विशेष सुरक्षा रणनीति तयार पारेको हो । उहाँले चाडपर्व लक्षित विशेष सुरक्षा योजना प्रभावकारी रूपमा कार्यान्वयन गरिने बताउनुभयो ।
बढ्दो कोरोना संक्रमणको जोखिमसँगै आउन लागेको दशैं, तिहार, छठलगायतका पर्वलाई लक्षित गरि प्रहरीले विशेष सुरक्षा योजना तयार पारेको उहाँको भनाईछ । उहाँले मर्यादित, अनुशासित ,व्यवस्थित र सुरक्षित तवरले चाडपर्व मनाउन आग्रह समेत गर्नुभयो ।
उहाँकाअनुसार चाडपर्वलाई मध्यनजर गरि सडकपुर बौनियामा यातृ सहायता कक्ष संचालनमा ल्याएको सुदुरचित्र मिडियालाई जानकारी समेत दिनुभयो । चाडपर्वमा हुनसक्ने चोरी, लुटपाट, मदिरा सेवन, झैझगडा ,जुवातास खेल्ने खेलाउने ,एवं अपराध नियन्त्रण रोक्न चाडपर्व लक्षित सुरक्षा योजनाअनुसार आवश्यक मात्रामा प्रहरी टोलि परिचालन गरेर सुरक्षा व्यवस्था कडा बनाइनेछ ।
यसैगरी बौनिया बजारमा संचालन गरिएको यात्रु सहायता कक्षबाट नागरिकलाई आवश्यक पर्ने सहयोग ,सल्लाह, व्यवस्थित रूपमा ट्राफिक व्यवस्थापन, यातायातको सहज उपलब्धताको लागि सहयोग तथा मास्क नलगाई हिड्नेलाई सम्झाइ बुझाइ र मास्क वितरण तथा खानेपानीको व्यवस्थापनको तयारी गरिएको छ ।
चाडपर्वमा हुने संबेदनसिल घटनालाई मध्यनजर गरि २४ सै घण्टा यात्रु सहायता कक्षबाट सेवा र मुडा बजारमा प्रहरी ड्युटी, बर्दगोरिया गाउँपालिकाको सवै क्षेत्रमा मोटरसाइकल र भ्यानबाट प्रहरी गस्ती गरिने कार्यालयका प्रहरी नायव निरीक्षक महतराले बताउनुभयो ।
उहाँले चाडबाडमा बढी मदिरा सेवन र होहल्ला ,झैझगडा बढी हुने भएको हुँदा साढे ९ बजेसम्म मात्रै होटल संचालन गर्न दिईने, झैझगडा तथा होहल्ला गर्नेलाई नियन्त्रणमा लिनेजस्ता काम सुरक्षा योजनामा राखिएको महतराले बताउनुभयो ।
उहाँले सवारी साधनमा यात्रा गर्दा अपरिचत व्यक्तिहरुले दिएको खाने कुरा नखान, र केही समस्या परे नजीकको प्रहरी कार्यालय र टोल फ्री नम्बर १०० मा कल गर्न आग्रह गर्नुभयो ।
