सुर्खेत। मालवाहक ट्रकले स्कुटरलाई ठक्कर दिँदा सुर्खेतमा एकजनाको मृत्यु भएको छ।
नेपालगञ्ज-सुर्खेत सडकखण्ड अन्तर्गत सुर्खेतको वीरेन्द्रनगर-११ ठूलो व्युरेनीमा मालवाहक ट्रकले स्कुटरलाई ठक्कर दिएको हो।
भेरीगंगा नगरपालिका-१२ छिन्चुबाट वीरेन्द्रनगरतर्फ आउँदै गरेको कर्णाली प्रदेश ०२०० प ७६६९ लाई जुम्लाबाट नेपालगञ्ज जाँदै गरेको कर्णाली प्रदेश ०२-००१ प ०१२४ नम्बरको मालवाहक ट्रकले ठक्कर दिएको हो।
दुर्घटनामा स्कुटर चालक भेरीगंगा नगरपालिका-१२ छिन्चुका २६ वर्षीय रविन राना मगरको मृत्यु भएको जिल्ला प्रहरी कार्यालय सुर्खेतका प्रवक्ता प्रहरी नायव उपरीक्षक रामप्रसाद घर्तीले जानकारी दिए।
रविनकी दिदी रानी राना मगर गम्भीर घाइते भएकी छिन्। उनको टाउकोमा चोट लागेको छ। उनको कर्णाली प्रदेश अस्पतालमा उपचार भइरहेको छ। डिएसपी घर्तीका अनुसार घाइतेको अवस्था गम्भीर छ।
ट्रक चालक फरार छन्। उनको खोजी कार्य जारी रहेको प्रहरीले जनाएको छ। दुर्घटनापछि आफन्तले छिन्चु बजार र सडकखण्ड बन्द गरेका छन्।
