जोशीपुर । कैलालीको जोशीपुर गाउँपालिकाले राजनीतिक दलमा आवद्ध शिक्षकहरुले तत्काल राजीनामा दिन निर्देशन दिएको छ । पालिकाले मङ्गलबार एक सूचना जारी गर्दै यस्तो निर्देशन दिएको हो ।
पालिकाद्वारा जारी सूचनामा भनिएको छ , जोशीपुर गाउँपालिकाको २०७९/०२/३१ गतेको बैठकमा भएको निर्णय बमोजिम प्रचलित शिक्षा ऐन २०२८ ( संशोधनसहित ) को दफा १६ दफा (ङ) को उपदफा ५ को (६) मा उल्लेखित व्यवस्था उल्लंघन गरि विभिन्न राजनीतिक दलमा सक्रिय रूपमा संलग्न रही विद्यालयको पठनपाठन प्रभावित हुनेगरी आचारण विपरीत कार्यगर्ने पालिकाभरका सामुदायिक विद्यालयमा कार्यरत शिक्षक तथा कर्मचारीलाई अबको ७ दिनभित्र राजीनामा दिन लगाई सोको बिबरण पालिकामा पेश गर्न अनुरोध गरिन्छ ।
पछिल्लो समय शिक्षकहरु विद्यालय र विद्यार्थीको भविष्य भन्दा पनि राजनीतिक दलको जिम्मेवारी बढी सम्हालने गरेका कारण शैक्षिक गुणस्तरलाई मध्यनजर गरि राजनीतिक दलमा सक्रिय शिक्षक तथा कर्मचारीको राजीनामा माग गरिएको पालिकाका अध्यक्ष चित्र बहादुर चौधरीद्वारा हस्ताक्षरित सूचना मा उल्लेख छ ।
