बर्दगोरिया । पछिल्लो समय कैलालीको बर्दगोरिया गाउँपालिका वडा नम्बर ६ मा पशु सेवा शाखा इकाई स्थापना भएपछि स्थानीय जातका पशुको कृतिम गर्भाधान गरी नश्ल सुधार गर्न कृषक आकर्षित भएका छन् । कृत्रिम गर्भाधानबाट जन्मिएका बाच्छा- बाच्छी तथा पाडा पाडीको नश्ल सुधार हुने र दूध तथा मासुको गुणस्तरमा वृद्धि हुने भएकाले किसानको आकर्षण कृतिम गर्भाधानतर्फ बढेको हो।
परम्परागत पशुपालनबाट व्यावसायिकतामा फड्को मार्दै गरेको नेपालको पशुपालनमा कृतिम गर्भाधान सेवा विस्तार भएसँगै पशु गर्भाधानको लागि राँगो तथा साँढेको विकल्पमा कृत्रिम गर्भाधान सेवा प्रभावकारी बन्दै गएको पाइएको छ ।
पालिकाको पशुसेवा कार्यालयले गाउँगाउँमा कृतिम गर्भाधान सेवा विस्तार गरेसँगै किसान आकर्षित हँदै गएका हुन् । पशु सेवा इकाई स्थापना भएको एक वर्षको अवधिमा शाखाले १३ हजार ७ सय ८९ पशुलाई सेवा प्रदान गरेको छ ।
बर्दगोरिया ६ स्थित पृथ्वीपुरमा गत असार ८ गते पशु सेवा शाखा स्थापना भएको थियो । शाखाका नायव पशु सेवा प्राविधिक युवराज कठरियाका अनुसार यो एक वर्षको अबधिमा ४ हजार ३ सय ४० किसानले लाभ लिएका छ्न । स्थानीय स्तरमै शाखाबाट सेवा पाउने भएपछि किसानहरु लाभान्वित बनेको उनले बताए । उनकाअनुसार शाखाबाट मुख्यगरी वडा नम्बर ६,५,४, २ र १ नम्बर वडाका किसानले सेवा लिएका छ्न ।
कृतिम गर्भाधानप्रति किसान आकर्षित
पशुको कृतिम गर्भाधान सेवालाई गाउँ-गाउँसम्म पुर्याइएपछि किसान लाभान्वित बन्दै गएका छ्न । आफूले चाहे अनुसारको उन्नत जातको पशुको उत्पादन हुने, छिटो, सजिलो र दूधको उत्पादनमा वृद्धि हुने भएकाले किसान कृत्रिम गर्भाधान प्रक्रियामा आकषिर्त भएको शाखाका नायव पशु सेवा प्राविधिक कठरियाले बताए ।
शाखा संचालनको एक वर्षको अवधिमा २०९ पशुको कृतिम गर्भाधान गरिएको छ । हालसम्म १०१ गाई, ७५ भैंसी र ३३ वटा बाख्राको गरि २०९ पशुको कृतिम गर्भाधान गरिएको हो ।कृत्रिम गर्भाधानबाट जन्मेका पशुमा रोग नलाग्ने, गर्भ नतुहिने, बच्चा मर्ने सम्भावना कम हुने र बढी दूधालु हुने हुन्छ ।
कृत्रिम गर्भाधानबाट उन्नत जातको पशु उत्पादन हुने तथा दूध उत्पादन पनि बढ्ने भएपछि किसान कृतिम गर्भाधानप्रति आकर्षित भएको कठरियाले बताए । कृतिम गर्भाधानबाट दूध पनि बढी उत्पादन हुने, दुई÷तीन वर्षसम्म राँगो, साँढे पाल्ने झन्झट नहुने र नश्ल पनि सुधार हुनेभएपछि कृषक यसमा आकर्षित छन् ।
