लम्की । कैलालीको लम्कीचुहा नगरपालिकाले आगामी आर्थिक वर्षका लागि नीति तथा कार्यक्रम सार्वजनिक गरेको छ । नगरपालिकाले आर्थिक बर्ष २०७९/०८० को लागि १ अर्ब ४२ करोड १७ लाख ८० हजारको अनुमानित बजेट सार्वजनिक गरेको छ ।
शुक्रबार लम्कीचुहा नगरपालिकाको नबौँ नगर सभामा नगर प्रमुख सुशीला शाहीको अनुमतिमा नगर सभा सदस्य तथा वडा नं ३ का वडा अध्यक्ष लब बहादुर शाहीले प्रस्तुत गरेका हुन् । सबल स्थानीय सरकार : समुन्नत, सुखी र समृद्ध नगर नारा लिएको छ नगरपालिकाले सूचना तथा संचारलाई समेत विशेष प्राथमिकतामा राखेको छ ।
सूचना तथा सञ्चार;
१. सार्वजनिक संघसंस्थाहरुमा सरल र सहज रुपमा सेवा प्रवाह गर्न फ्री वाइफाइसेवा दिइनेछ ।
२. सबै टोल र गाउँमा इन्टरनेटको सुबिधा पुर्याइने छ ।
३.वडास्तरमा डिजिटल सूचना कक्षको स्थापना गरिने छ ।
४. सूचनाको हकलाई पूर्णरुपमा सुनिश्चित गरिनेछ ।
५. युवाहरुलाई रेडियो उदघोषण तथा पत्रकारिता सम्बन्धि प्रशिक्षण कार्यक्रम सञ्चालन गरी जनशक्ति उत्पादन तथा समुदायमा आधारित कार्यक्रमहरु सञ्चालन गरिनेछ ।
६. नगरभित्रका संलाचलनमा रहेका सामुदायिक रेडियोहरुलाई अनुदान प्रोत्साहनको कार्यक्रम सञ्चालन गरिनेछ ।
७. नगरभित्रका संचारका माध्यमहरुलाई प्रोत्साहन अनुदानको व्यवस्था गरिनेछ ।
८. संचार माध्यम तथा संचारकर्मीहरुलाई आवश्यक संचार सहायक, संचार उपकरण र संचार उद्यमका समाग्री तथा प्रविधी खरिदका लागि सहुलियत कर्जाका लागि पहल गरिनेछ ।
९.नगरभित्र रहेका सार्वजनिक कार्यालयहरुमा Degital Payment सेवाको थालनी गरिनेछ ।
१०. महिनाको दुइ पटक जनता संग मेयर कार्यक्रम संचालन गरी नगरबासीहरुका जनगुनासो सम्बोधन गरिनेछ ।
११. नगरपालिकाले गर्नु पर्ने नियमित सार्वजनिक सुनुवाइ कार्यक्रम मापदण्ड पुरा गरेका यस क्षेत्रका संचार माध्यम र संचारकर्मीहरुलाई प्राथमिकता दिईनेछ ।
नगरपालिकाको आगामी आर्थिक वर्षको नीति तथा कार्यक्रममा ज्येष्ठ नागरिकलाई निशुल्क स्वास्थ्य उपचार देखि एक वर्षमा लालपूर्जा वितरण सम्मका कार्यक्रम अघि सारेको छ । नीति तथा कार्यक्रममा ‘ ज्येष्ठ नागरिक व्यक्तिलाई उपचारमा प्राथमिकता दिई निशुल्क स्वास्थ्य उपचारको व्यवस्था गरिनेछ ।’ जेष्ठ नागरिक सम्बन्धी ऐन, २०६३ अनुसार ‘‘जेष्ठ नागरिक’’ भन्नाले ६० वर्षको उमेर पूरा गरेको नेपाली नागरिकलाई सम्झनुपर्ने उल्लेख गरेको छ ।
नगरपालिकाको नीति तथा कार्यक्रम अनुसार अब लम्कीचुहामा जेष्ठ नागरिकले निशुल्क स्वास्थ्य उपचारको सेवा पाउने भएका हुन् । त्यस्तै लगत सङ्कलनको काम सम्पन्न भएर रेखांकनको काम भइरहेको भूमिहीनलाई एक वर्षमा लालपूर्जा वितरण गर्ने नगरपालिकाको नीति रहेको छ । ‘स्थानीय सरकार जनताको साथमा एक वर्ष भित्र लाल पुर्जा हातमा नारालाई सार्थक बनाउन भूमिहीन, दलित, सुकुम्बासी र अव्यवस्थित बसोवासीको समस्या समाधान गर्न लगत संकलन, प्रमाणीकरण, जग्गा नापी र पूर्जा वितरण कार्यलाई यथाशीघ्र सम्पन्न गरिने उल्लेख छ ।
यसैगरी कृषि तर्फ एक घर एक करेसाबारी, पकेट क्षेत्रमा व्यवसायी तरकारी, निजी सार्वजनिक साझेदारीमा कृषि थोक बजारको स्थापना, निजी क्षेत्रको साझेदारीमा आधुनिक वधशाला निर्माण, कृषि राहत कोषको स्थापना, कृषिमा अनुदान दिने लगायतको नीति रहेको छ । त्ययस्तै पर्यटन तर्फमा नगर गौरवको योजनाको रुपमा चिसापानी पुलमा विद्युतीय सजावट र पानीको फोहोरा सहितको बगैचा, ,चिसापानी, राजकाँडा, आमपानी, ढकने, बल्चौर, ग्याङ्टीफाँटा, रिठाई ताल र मोहनलाल नगर पार्कलाई जोडेर पर्यटन सर्किट निर्माण गरी पूर्वाधार विकास र प्रवर्द्धनलाई जोड दिने, नगर पर्यटन विकास समितिको गठन लगायतका कार्यक्रमहरु रहेका छन् ।
