१६ चैत्र ,बैशाख । कैलालीको बर्दगोरिया गाउँपालिका वडा नम्बर १ स्थित मुडा गाउँमा पालिका स्तरीय भल्मन्साहरुको सभाहल निर्माण कार्य सुरु हुने भएको छ ।
पालिकाभित्र रहेका भल्मन्साहरुलाई कार्य सम्पादनमा सहजता, योजना तर्जुमा, विभिन्न सभा समारोह तथा कार्यक्रम गर्नका लागि सहजता पुगोस भन्ने उदेश्यका साथ उपभोक्ता समितिमार्फत सभाहल निर्माणको काम अगाडि बढाइएको हो ।
बर्दगोरिया गाउँ सरकारको २० लाख तथा स्थानीयको ५ लाख बढीको जनश्रमदानबाट निर्माण हुन लागेको भवनको शुक्रबार पालिका अध्यक्ष कर्ण बहादुर कुवर ,उपाध्यक्ष गणेश राज गिरिले संयुक्त रूपमा सभाहलको शिलान्यास गरेका छ्न ।
बर्दगोरिया भल्मन्सा समाजका अध्यक्ष पदम डगौराको सभाध्यतामा भएको कार्यक्रममा वर्षौपछि स्थानीय सरकारले सभाहल निर्माण गरिदिने भएपछि स्थानीय थारु बुद्धिजीवी तथा समाजसेवी भने खुशी भएका छ्न ।
कार्यक्रममा बर्दगोरिया गाउँपालिका वडा नम्बर १ का वडा अध्यक्ष मिथुन गौतमले जतिसक्दो छिटो सभाहल निर्माणको काम पूरा हुनेगरी काम गर्नुपर्ने भन्दै यसमा वडा र पालिकाबाट हुने सबै सहयोग गरिने बताए ।
शिलान्यास कार्यक्रममा पालिका उपाध्यक्ष गणेश राज गिरिले समृद्ध र समुन्नत समाज निर्माणमा भल्मसाहरुले पुराउदै आएको योगदानको उच्च प्रसङ्सा गरे । उनले आफ्नो धर्म,सस्कृतिक भेषभुषा तथा रितिरिवाजको संरक्षण गर्नका लागि सबैभन्दा बढी आफै जिम्मेवार बन्नुपर्ने बताए ।
भवनको शिलान्यास गर्दै बर्दगोरिया गाउँपालिका अध्यक्ष कर्ण बहादुर कुवरले थारु समुदायसहित यहाँ बसोबास गर्ने सबैको धार्मिक तथा सास्कृतिक क्षेत्रको संरक्षण र सम्बर्द्धनमा आफुले सक्दो सहयोग गर्ने प्रतिबद्धता व्यक्त गरेका छ्न ।
भलमन्सा (बडघर) प्रथा थारू समुदायमा सदियौँदेखि प्रचनमा रहेको छ। थारू गाउँमा हरेक माघमा समुदायका व्यक्तिहरूले भलमन्सा चयन गर्छन् । समुदायमा हुने झैझगडा, वादविवाद, न्याय निसाफलगायतका काम भलमन्सा प्रथाबाटै हुने गरेको छ ।
गाउँको मुखियाका रूपमा भलमन्सा चयन हुन्छन् । यो प्रथामा भलमन्सासँगै अघारी, चिरक्या, चौकीदार, गुरुवा, केसौको पनि चयन गर्ने गरिन्छ । अघारीले भलमन्साको अनुपस्थितिमा भलमन्साको प्रतिनिधिको रूपमा काम गर्छन् ।
