काठमाडौं । राष्ट्रिय परीक्षा बोर्डले २०८० सालको माध्यमिक शिक्षा परीक्षा (एसईई) आगामी चैतको पहिलो र १२ को वैशाखको दोस्रो साता गर्ने गरी वार्षिक क्यालेन्डर सार्वजनिक गरेको छ । बोर्डले उच्च शिक्षाको राष्ट्रिय शैक्षिक क्यालेन्डरसम्बन्धी प्रतिवेदन कार्यान्वयन गर्न क्यालेन्डर सार्वजनिक गरेको हो । सो क्यालेन्डर यो वर्षबाट लागू भएको राष्ट्रिय परीक्षा बोर्डका अध्यक्ष डा.महाश्रम शर्माले जानकारी दिनुभयो ।
![](http://sudurchitra.com/wp-content/uploads/2023/09/Picsart_23-09-28_08-23-52-074.jpg)
–कक्षा १० को सबै अधिकार प्रदेशलाई
गत वर्षको एसईईको परीक्षाफल असार अन्तिम साता भएको थियो । ‘कक्षा १० को वार्षिक परीक्षाको नतिजा असार दोस्रो हप्तामा गर्ने गरी कार्यतालिका सार्वजनिक गरेका छांै’ –अध्यक्ष शर्माले भन्नुभयो । पूरक परीक्षा साउन तेस्रो साता हुनेछ । परीक्षामा पुनर्योगको निवेदन परीक्षाफल प्रकाशित भएको १५ दिनभित्र र नतिजा पूरक परीक्षा सञ्चालन हुनुअघि रहेको छ । माघ मसान्तमा परीक्षा केन्द्र निर्धारण, सिम्बोल नम्बर कायम गर्ने रहेको छ ।
शिक्षा, विज्ञान तथा प्रविधि मन्त्रालय, विश्वविद्यालय अनुदान आयोग, सबै विश्वविद्यालय र रापबोर्डका अध्यक्षसहितको बैठकको निर्णयअनुसार क्यालेन्डर तयार भएको हो । सो क्यालेन्डर उल्लेख भएअनुसार स्नातक तहको भर्ना प्रक्रिया शुरू गर्नुअघि कक्षा १२ को परीक्षाफल प्रकाशित हुनुपर्छ ।
सोही निर्णयको आधारमा वैशाख दोस्रो साता कक्षा १२ को परीक्षा सञ्चालन गरी साउन मसान्तभित्र परीक्षाफल प्रकाशित गर्ने क्यालेन्डर तयार गरेको हो । क्यालेन्डरसम्बन्धी प्रतिवेदनमा स्नातक तहमा भर्ना हुनका लागि रापबोर्डबाट नतिजा हुने कक्षा १२ को नतिजा भर पर्नुपर्ने भएकाले कक्षा १२ को कार्यतालिका अनुसार सो कक्षाको परीक्षाफल साउन मसान्तलाई आधार मानेर तयार गरिएको उल्लेख छ ।
‘क्यालेन्डर तयार समितिको बैठकको निर्णयको आधारमा कक्षा १२ को परीक्षा वैशाख दोस्रो र परीक्षाफल साउन मसान्तभित्र गर्ने गरी निर्णय गरेका हांै’ –बोर्डका अध्यक्ष डा. शर्माले भन्नुभयो । सोही क्यालेन्डरको आधारमा सबै विश्वविद्यालयले कक्षा १२ को परीक्षाफल प्रकाशित भएको मितिले ६० दिनभित्र स्नातक तहको भर्ना गरिसक्नुपर्नेछ । त्यस ६० दिने तालिकामा चाडपर्व तथा अन्य सार्वजनिक बिदालाई सोही तालिकामा व्यवस्थापन गर्नुपर्ने उल्लेख छ । बोर्डका अध्यक्ष डा. शर्माले यो वर्षबाट परीक्षा सञ्चालन र परीक्षाफल प्रकाशित हुने मिति गत वर्षभन्दा छिट्टै गर्ने गरी तयारी भइरहेको जानकारी दिनुभयो । बोर्डले क्यालेन्डर लागू गर्न प्रदेश परीक्षा बोर्ड, प्रदेश शिक्षा निर्देशनालय, जिल्ला शिक्षा समन्वय इकाइलगायत सरोकारवाला निकायसँग चरणबद्ध छलफल जारी राखेको जनाएको छ ।