बर्दगोरियामा माघ १८ देखि विद्यार्थीहरुका लागि कोरोनाविरुद्धको खोप अभियान संचालन हुँदै
बौनिया, कैलाली । कैलालीको बर्दगोरिया गाउँपालिकामा विद्यार्थीहरुका लागि कोभिड – १९ विरुद्धको खोप अभियान संचालन गरिने भएको छ । गाउँपालिका भित्र संचालित सामुदायिक तथा संस्थागत (निजी) विद्यालयमा अध्यनरत १२ वर्षदेखि १७ वर्ष उमेर समूहका बालबालिकाका लागि यही माघ १८ गतेदेखि कोरोना विरुद्धको खोप अभियान सुरु गरिने भएको हो ।
पालिका प्रमुख प्रशासकिय अधिकृत अर्जुन सिंह कार्कीका अनुसार विद्यार्थी तथा बालबालिकालाई माघ १८ गते मंगलबारदेखि मोडर्ना खोप लगाउन थालिएको हो। उहाँका अनुसार २ सयबढी विद्यार्थी सङ्ख्या भएका विद्यालयको हकमा विद्यालयमा नै खोप अभियान संचालन गरिनेछ भने सो भन्दा कम विद्यार्थी सङ्ख्या भएका विद्यालयका बालबालिकालाई नजिकको स्वास्थ्य संस्थाबाट खोप लगाउने छ्न ।
भौतिक उपस्थितिमा पठनपाठन बन्द रहेपनि विद्यार्थीलाई खोप लगाउने प्रयोजनका लागि विद्यालय खोलिनेछ । यसअघि २७ पुसदेखि १५ माघसम्म सबै विद्यालय बन्दको निर्णय भएकोमा लम्ब्याएर माघ मसान्तसम्म कायम गरिएको छ ।
बर्दगोरिया गाउँपालिकामा १७ सामुदायिक र २३ निजि विद्यालय संचालनमा छ्न । बालबालिकालाई संचालन गरिने कोभिड – १९ विरुद्धको खोप अभियानका लागि आवश्यक परामर्श र समन्वय गर्न स्वास्थ्य संस्था ,विद्यालय र मातहतका स्वास्थ्य इकाईलाई पालिकाले निर्देशन समेत दिएको छ ।
कैलालीमा एक कोरोना संक्रमित महिलाको मृत्यु
धनगढी । कैलालीमा एक कोरोना संक्रमित महिलाको मृत्यु भएको छ । जिल्लाको गौरीगंगा नगरपालिकाकी ६५ वर्षीया महिलाको आज बिहान मृत्यु भएको जिल्ला प्रशासन कार्यालय कैलालीले जनाएको छ ।
सेती प्रादेशिक अस्पताल अस्पतालमा उपचाररत उनको आज बिहान मृत्यु भएको जिल्ला प्रशासन कार्यालय कैलालीका सूचना अधिकारी शिवराज जोशीले बताए ।
ती महिलालाई शनिबारदेखि अस्पतालको आईसीयूमा राखेर उपचार भइरहेको थियो ।
काठमाडौं । सरकारले पाँचदेखि ११ वर्ष उमेर समूहका बालबालिकालाई पनि कोरोना भाइरसविरुद्धको खोप लगाउने तयारी गरेको छ । त्यसका लागि उक्त उमेर समूहका बालबालिकाले लगाउन मिल्ने फाइजर खोप खरिद प्रक्रियासमेत अगाडि बढाइएको छ ।
कोरोना सङ्क्रमणको उच्च जोखिममा बालबालिका पनि पर्ने भएकाले सरकारले ११ वर्षसम्मका बालबालिकालाई लक्षित गर्दै फाइजर खोप ल्याउन प्रक्रिया सुरु गरेको हो । हाल ११ देखि १८ वर्षसम्मका बालबालिकालाई फाइजर र मोडर्ना खोप लगाइँदैछ ।
पाँच वर्षभन्दा माथिका बालबालिका पनि विद्यालय जाने र त्यहाँ भिडभाड हुने हुनाले सङ्क्रमणको उच्च जोखिममा छन् । स्वास्थ्य तथा जनसङ्ख्या मन्त्रालयका सचिव डा। रोशन पोखरेलले पाँचदेखि ११ वर्षसम्मका बालबालिकालाई लक्षित गरेर फाइजर खोप ल्याउन सरकारले प्रक्रिया सुरु गरिसकेको जानकारी दिए । दुई–तीन महिनाभित्रै उक्त खोप आउन सक्ने सम्भावना रहेको बताए ।
लमजुङ । हिमपातकै अवस्थामा पनि मनाङमा कोभिड–१९ विरुद्धको ‘बुस्टर’ खोप अभियान सञ्चालन भइरहेको छ ।
कोभिशिल्ड र भेरोसेलको दोस्रो मात्रा लगाएर ६ महिना पूरा भएका नागरिकका लागि बुस्टर खोप लगाउने कार्यक्रम सञ्चालन गरिएको स्वास्थ्य कार्यालय मनाङले जनाएको छ ।
मनाङमा कोभिशिल्ड र भेरोसेल खोप उपलब्ध भएको स्वास्थ्य कार्यालय मनाङका प्रमुख बद्री आचार्यले बताउनुभयो । उहाँका अनुसार प्राथमिकतामा पर्ने सुरक्षाकर्मी, ज्येष्ठ नागरिक, विभिन्न बिरामी साथै अन्य सर्वसाधारणलाई पनि बुस्टर खोप लगाउन थालिएको छ ।
“प्राथमिकतामा पर्ने सँगै अन्य नागरिकलाई पनि बुस्टर खोप लगाउन थालिएको हो । मनाङमा १८ वर्षभन्दा माथिका सबैले कोरोना विरुद्धको पहिलो र दोस्रो मात्राको खोप लगाइसकेका छन् ।”, उहाँले भन्नुभयो । उहाँले पहिलो र दोस्रो खोपको मात्रा लगाइसकेका ४ हजार ३ सय ९९ जना रहेको जानकारी दिनुभयो।
उहाँका अनुसार यसअघि चामे गाउँपालिकामा बुस्टर खोप लगाउन सुरु गरिएकोमा तल्लो क्षेत्रको नासों गाउँपालिकामा आइतबारदेखि बुस्टर खोप लगाउन थालिएको छ । माथिल्लो मनाङको मनाङ ङिस्याङ गाउँपालिकामा माघ २० बाट लगाउने तयारी छ ।
नार्पाभूमि गाउँपालिकामा चिसोका कारण सबै जना काठमाडौँ, पोखरा, बेंसीसहर झरेकाले फागुनमा मात्रै बुस्टर खोप लगाउने कार्यक्रम तयार भएको छ ।
मनाङ सबैभन्दा पहिलो कोरोना विरुद्धको पूर्ण खोपयुक्त जिल्ला हो । २०७७ माघ महिनामा १८ वर्षमाथिका उमेर समूहका मनाङ जिल्लावासीले पूर्ण मात्रा खोप लगाइसकेका छन् ।
प्रमुख जिल्ला अधिकारी रवीन्द्रप्रसाद आचार्यले जिल्लामा कोरोनाको खोपलाई प्राथमिकतामा राखिएको बताउनुभयो ।
बौनिया, कैलाली । कोरोना संक्रमणबाट कैलालीको बर्दगोरिया गाउँपालिका वडा नम्बर ४ निवासी एक पुरुषको मृत्यु भएको छ ।
जिल्ला प्रहरी कार्यालय कैलालीका अनुसार बर्दगोरिया गाउँपालिका ४ बस्ने बर्ष ७५ पुरुषको बिहिवार मृत्यु भएको हो । ती व्यक्ति क्षयराेग सम्बन्धि विरामी भई उपचारको लागि सेती प्रादेशिक अस्पताल धनगढीमा यही माघ ७ गते भर्ना भएका थिए ।
ती पुरुषमा पीसीआर चेक गर्दा रिपोट कोरोना पोजेटिभ भई अस्थायी कोरोना अस्पताल धनगढीको आइसीयुमा राखि उपचार भई रहेको थियो ।
उनको बिहिवार दिउसो पौने ५ बजेको समयमा उपचारको क्रममा मृत्यु भएको जनाइएको छ ।
बाँकेमा कोरोना संक्रमणबाट एक जना महिलाको मृत्यु
नेपालगञ्ज । बाँकेमा कोरोना संक्रमणबाट एक जना महिलाको मृत्यु भएको छ ।
कोहलपुर नगरपालिका वडा नम्बर २ की ७० वर्षीया महिलाको उपचारका क्रममा आज बिहान भेरी अस्पतालमा मृत्यु भएको जिल्ला कोभिड संकट व्यवस्थापन केन्द्र बाँकेका सम्पर्क व्यक्ति तेज वलीले बताउनुभयो ।
माघ ८ गते नेपालगञ्ज मेडिकल कलेज कोहलपुरमा पिसिआर परीक्षण गराएकी उनी ९ गते भेरी अस्पतालमा भर्ना भएकी थिइन् । ओमिक्रोन संक्रमण फैलिएपछि भेरी अस्पतालमा यो दोस्रो मृत्यु हो । यसअघि माघ ३ गते दाङकी एक महिलाको मृत्यु भएको थियो ।
सुदूरपश्चिमका चार जनामा पहिलो पटक ओमिक्रोन पुष्टि
धनगढी । सुदूरपश्चिमका चार जनामा पहिलो पटक ओमिक्रोन पुष्टि भएको छ । जनस्वास्थ्य प्रयोगशाला काठमाण्डौंमा गरिएको परीक्षणमा यहाँका चार जनामा ओमिक्रोन संक्रमण देखिएको सुदूरपश्चिमको सामाजिक विकास मन्त्रालयले जनाएको छ ।
भारतबाट फर्किएका बझाङका ३३ वर्षीय पुरुष, डोटीका ४८ वर्षीय पुरुष र कञ्चनपुरको दोधाराचाँदनी र पुनर्वास का ४२ र २९ वर्षीय पुरुषमा ओमिक्रोन पुष्टि भएको सामाजिक विकास मन्त्रालयका प्रवक्ता नरेन्द्रसिंह कार्कीले बताए ।
एन्टीजेन पोजेटिभ देखिएकामध्ये एक सय ४६ जनाको परिक्षण गर्दा चार जनामा ओमिक्रोन भेटिएको उनले बताए । पुस २५ गते ओमिक्रोन परीक्षणका लागि नमुना काठमाडौं पठाइएको थियो । ओमिक्रोन पुष्टि भएकाको त्रिनगर हेल्थडेस्कमा नमुना संकलन गरिएको मन्त्रालयका प्रवक्ता कार्कीले जानकारी दिए ।
कोरोना कहर ; जोशीपुर गाउँपालिका भर स्वास्थ्य र सरसफाइ बाहेकका सबै सेवा माघ १८ गतेसम्मका लागि बन्द
जोशीपुर । कोभिड संक्रमण तीव्र गतिमा बढेपछि कैलालीको जोशीपुर गाउँपालिकाले अत्यावश्यक स्वास्थ्य र सरसफाइ बाहेकका सेवा १८ गतेसम्मका लागि स्थगित गरेको छ ।
पालिकाले आज सूचना निकालेर भोलिदेखि माघ १८ गतेसम्मका लागि गाउँपालिकाको कार्यालय र मातहतका वडा कार्यालय बाट प्रदान गरिदै आएका स्वास्थ्य र सरसफाइ बाहेकका सवै सेवा बन्द गरिएको जनाएको छ ।
पालिकामा कार्यरत केही कर्मचारी समेत कोरोना पोजेटिभ देखिएपछि सेवा बन्द गर्नुपर्ने स्थिति आएको प्रमुख प्रशासकिय अधिकृत कमल राज उपाध्यायद्वारा हस्ताक्षरित सूचनामा उल्लेखित छ ।
कार्यालयमा कार्यरत कर्मचारीहरूमा नियमित कार्य सम्पादनको क्रममा केही कर्मचारीहरूमा कोरोना संक्रमण भएको र केहीलाई मिल्दोजुल्दो लक्षण देखा परी आइसोलेसनमा बसेको तथा सेवाग्राहीको अत्यधिक भिडभाडका कारण कार्यालयबाटै कोरोना फैलिन सक्ने जोखिमलाई मध्यनजर गर्दै कार्यालयबाट सम्पादन हुने
स्वास्थ्य र सरसफाइ बाहेक सबै सेवा बन्द गरिएको जारी सूचनामा उल्लेख छ ।
नेपालगन्ज । कोभिड संक्रमण तीव्र गतिमा बढेपछि बाँके प्रशासनले सबै सेवा स्थगित गरेको छ ।
जिल्ला प्रशासन कार्यालय बाँकेले आज सूचना निकालेर भोलिदेखि अर्को सूचना जारी नभएसम्मका लागि अत्यावश्यक (शान्ति सुरक्षा र मुद्दा) बाहेक सबै सेवा हाललाई स्थगन गरेको जनाएको छ ।
कार्यालयमा कार्यरत कर्मचारीहरूमा नियमित कार्य सम्पादनको क्रममा केही कर्मचारीहरूमा कोरोना संक्रमण भएको र केहीलाई मिल्दोजुल्दो लक्षण देखा परी आइसोलेसनमा बसेको तथा सेवाग्राहीको अत्यधिक भिडभाडका कारण कार्यालयबाटै कोरोना फैलिन सक्ने जोखिमलाई मध्यनजर गर्दै कार्यालयबाट सम्पादन हुने अत्यावश्यक बाहेक सबै सेवा बन्द गरिएको प्रमुख जिल्ला अधिकारी सूर्य बहादुर खत्रीद्वारा जारी सूचनामा उल्लेख छ ।
साथै अत्यावश्यक सेवा लिन आउने सेवाग्राहीलाई स्वास्थ्य मापदण्डको पालना गर्दै कोभिड विरुद्ध खोप लगाएको कार्ड (मोबाइलमा फोटो भए पनि हुने) लिएर आउन आग्रह पनि गरिएको छ ।
काठमाडौं । थाम्नै नसक्ने गरी दैनिकजसो कोरोनाका संक्रमित बढेसँगै सरकारले कोरोनाभाइरस संक्रमण भए नभएको पुष्टि गर्न गरिने पीसीआर परीक्षणको शुल्क घटाएको छ ।
पीसीआर परीक्षणको शुल्क शुल्क घटाएर ८०० रुपैयाँ कायम गरिएको स्वास्थ्य तथा जनसंख्या मन्त्रालयका सहप्रवक्ता डा. समीरकुमार अधिकारीले जानकारी दिए ।
उनका अनुसार पीसीआर परीक्षण एक हजार रुपैयाँ लिँदै आएको अब २०० रुपैयाँ घटाएर ८०० रुपैयाँ कामय गरिएको हो ।
सरकारी प्रयोगशालाले लिइँदै आएको एक हजार रुपैयाँ शुल्कलाई घटाएर ८०० रुपैयाँ कायम गरेको डा. अधिकारीले जानकारी दिए ।
उनका अनुसार निजी प्रयोगशालाले पीसीआर परीक्षण गर्दा बढीमा एक हजार ५०० रुपैयाँ मात्र लिन पाउनेछन् ।