दर्खास्त नपरेपछि शिक्षकका लागि पाँचौँ पटक विज्ञापन
काठमाडौँ । प्युठानको एउटा विद्यालयले शिक्षकका लागि पाँच पटक सूचना निकालेको छ । ग्रामीण र दुर्गम क्षेत्रमा शिक्षकको अभाव छ भन्ने यो पछिल्लो उदाहरण हो ।
गौमुखी गाउँपालिका वडा नं १ मा रहेको अर्खा माध्यमिक विद्यालयले माध्यमिक तह संघीय अनुदान कोटाको विज्ञान विषयको पदका लागि पाँचौँ पटक सूचना निकालेर दर्खास्त आह्वान गरेको हो । पटक पटकको विज्ञापनमा दर्खास्त नपरेपछि पाँचौँ पटक विज्ञापन गर्नु परेको विद्यालयका प्रधानाध्यापक लिलु प्रसाद पौडेलले जानकारी दिए । दर्खास्त नपरेपछि विद्यालयले पछिल्लो पटक अध्यापन अनुमति पत्र नभएकाहरूले पनि निवेदन दिन सक्ने गरी दर्खास्त आह्वान गर्न बाध्य भएको छ ।
पहिलो पटक गत फागुन २६ को निर्णय अनुसार १५ दिनको म्याद राखेर दर्खास्त आह्वान गरिएको थियो । त्यति बेला कुनै निवेदन परेन । दोस्रो पटक ७ सात दिनको म्याद राखेर निवेदन आह्वान गरेकोमा त्यति बेला पनि कुनै दर्खास्त नपरेको प्रधानाध्यापक पौडेलले बताए । उनका अनुसार तेस्रोमा पटक पनि दर्खास्त परेन ।
चौथो पटक दुई जनाको निवेदन परेकोमा दुवै उम्मेदवार नआएपछि विद्यालयले पाँचौँ पटक दर्खास्त आह्वान गरेको हो । आवेदन नै नपरेपछि अध्यापन अनुमति पत्र नभएको योग्य व्यक्तिले समेत दर्खास्त दिन सक्ने, तर अध्यापन अनुमति पत्र भएको व्यक्तिलाई प्राथमिकता दिने गरी पाँचौँ पटक सूचना निकालेको प्रधानाध्यापक पौडेलले बताए ।
अध्ययन अनुमति पत्र नभएका व्यक्तिको फोन आएकाले विद्यालयले अध्ययन अनुमति पत्र नभएकाले पनि निवेदन दिन सक्ने गरी दर्खास्त आह्वान गरेको हो । बिहीबारसम्म जम्मा दुई जनाको निवेदन परेको छ ।
उक्त पदका लागि करिब ४३ हजार पाँच सय तलब स्केल छ । ग्रामीण क्षेत्रका विद्यालयमा ट्युसनलगायतका अतिरिक्त कक्षाबाट थप आम्दानी नहुने भएकाले शिक्षकहरू आउन नचाएको पौडेलले बताए । गाउँपालिकाका सूचना अधिकारी दुर्गा प्रसाद सुवेदीले संघीय अनुदानमा रहेको पदमा शिक्षकको अभाव रहेको जानकारी दिए ।
नवलपरासी । पश्चिम नवलपरासीको बर्दघाट नगरपालिकाले पालिकाबाट सेवा सुविधा लिने कर्मचारी तथा शिक्षकले आफ्ना छोराछोरीलाई सामुदायिक विद्यालयमा पढाउनुपर्ने अभियान सञ्चालन गरेको छ । नगरपालिकाले सामुदायिक विद्यालयको गुणस्तर सुधारका लागि यस्तो अभियान सञ्चालन गरेको हो । नगरप्रमुख शम्भुलाल श्रेष्ठका अनुसार आगामी आर्थिक वर्षलाई शैक्षिक सुधार वर्षको रूपमा कार्यान्वयन गर्न बजेटको प्राथमिकीकरण गरिने तयारी भएको छ । सामुदायिक विद्यालयहरूको शैक्षिक गुणस्तर सुधारका लागि बजेटमार्फत नै प्राथमिकतामा समेटिन लागेको हो । विद्यालयको भौतिक संरचनालाई मात्र होइन शैक्षिकस्तर सुधार अपरिहार्य भएकाले सम्भव भएसम्म अधिकतम बजेट छुट्याउने योजना रहेको उनले बताए ।
वडाहरूलाई अब स्वायत्त बनाइने गरी थप १० करोड रकम विनियोजन गरिनेछ । वडाको जनसङ्ख्या, भूगोल, उत्पादन, कर सङ्कलनको अवस्थालगायत मापदण्डका आधारमा बजेट दिइने छ,” नगरप्रमुख श्रेष्ठले भने । राज्यकोषबाट सुविधा लिनेले अनिवार्य रूपमा सामुदायिक विद्यालयमा आफ्ना सन्तान पढाउनुपर्नेमा जोड दिए। हाल नगरपालिका क्षेत्रका ३७ वटा सामुदायिक विद्यालयमा ११ हजार विद्यार्थी अध्ययनरत छन् ।
कोहलपुर । बाँकेको कोहलपुर नगरपालिकाले शिक्षा शाखा प्रमुखसहित १६ जना शिक्षक तथा कर्मचारीहरूलाई कारबाही सिफारिस गरेको छ ।गत चैत २ देखि ९ गतेसम्म चलेको कक्षा ८ को परीक्षा सञ्चालन र नतिजा प्रकाशनमा अनियमितता गरेको पुष्टि भएपछि उनीहरूलाई कारबाहीको लागि सिफारिस गर्ने निर्णय भएको हो ।
नगर कार्यपालिकाको बैठकले शिक्षा शाखा प्रमुख रामबहादुर हमाल, शिक्षा शाखा अधिकृत रविलाल मिजार, शिक्षा शाखा सहायक पाँचौँ बलबहादुर नेपालीसहित शिक्षक तथा कर्मचारीलाई कारबाहीको लागि सिफारिस गर्ने निर्णय गरेको हो ।
बैठकले शिक्षा शाखा प्रमुख हमाललाई निजामती सेवा ऐन, २०४९ को दफा ५५ (क) बमोजिम कारवाही गर्ने र काज फिर्ता गर्ने निर्णय गरेको छ । शिक्षा शाखा अधिकृत सातौँ रविलाल मिजारलाई निजामती सेवा ऐन, २०४९ को दफा ५९ बमोजिम विभागीय कारवाही र दफा ६४ बमोजिम निलम्बन गर्ने निर्णय भएको छ।
यसै गरी शिक्षा शाखा सहायक पाँचौँ बल बहादुर नेपालीलाई निजामती सेवा ऐन, २०४९ को दफा ५५ क बमोजिम, शिक्षक कर्मचारीहरूलाई शिक्षा ऐन २०२८ को दफा १७ को उपदफा १ (क) बमोजिम र नगरपालिकाको स्रोतबाट करारमा नियुक्ति पाई छानबिनको क्रममा कारवाहीको सिफारिस गरिएका शिक्षक वा कर्मचारीलाई करारनामा बमोजिम सम्झौता भङ्ग गर्ने निर्णय नगरपालिकाले गरेको छ ।
मिजार निलम्बनमा परेका छन् भने करारका कर्मचारीको सम्झौता भंग गरिएको छ ।
किन रोकियो मध्यपश्चिम र सुदूरपश्चिम विश्वविद्यालयको उपकुलपति नियुक्ति प्रक्रिया?
काठमाडौं । मध्यपश्चिम र सुदूरपश्चिम विश्वविद्यालयको उपकुलपति नियुक्ति प्रक्रिया रोकिएको छ। उपकुलपति नियुक्तिका लागि नाम सिफारिस गर्न गठित छनोट तथा सिफारिस समितिको आइतबारको बैठकले नियुक्ति प्रक्रिया स्थगित गर्ने निर्णय गरेको हो।
समितिले सोमबार सार्वजनिक सूचना जारी गर्दै हाललाई दरखास्त आह्वानसम्बन्धी सम्पूर्ण प्रक्रिया स्थगन गरिएको जनाएको छ।
गत माघ २६ गते सार्वजकि सूचना जारी गर्दै समितिले १० दिनको समय दिएर उपकुलपति नियुक्तिका लागि दरखास्त आह्वान गरेको थियो। १० दिनको समय सकिएर नियुक्ति प्रक्रिया अघि बढाउनुपर्नेमा स्थगित गर्नुको कारण भने खुलाइएको छैन।
त्रिभुवन विश्वविद्यालयको उपकुलको नियुक्ति प्रक्रिया भने अन्तिम चरणमा पुगेको छ। उपकुलपति नियुक्तिका लागि नाम सिफारिस गर्न गठित समितिले सोमबार प्राध्यापक चित्रबहादुर बुढाथोकी, केशरजंग बराल र टंकनाथ धमलाको नाम सिफारिस गरेको हो।
तीनजनामध्ये एकजनालाई विश्वविद्यालयका कुलपति समेत रहेका प्रधानमन्त्रीले उपकुलपति नियुक्त गर्ने छन्। थाहा खबरबाट
कक्षा १२ को परीक्षा तालिका सार्वजनिक (तालिकासहित)
फागुन ५, काठमाडौं । कक्षा १२ को वार्षिक परीक्षाको समय तालिका सार्वजनिक भएको छ । शुक्रबार राष्ट्रिय परीक्षा बोर्ड, परीक्षा नियन्त्रण कार्यालय भक्तपुरले २०८१ बैशाख १४ गतेदेखि हुने परीक्षाको समय तालिका सार्वजनिक गरेको हो ।परीक्षा आगामी बैशाख १४ गतेदेखि बिहान ८ बजेदेखि ११ बजेसम्म सञ्चालन हुने पनिकाले जनाएको छ । पनिकाका अनुसार परीक्षा बैशाखको २६ गते सकिने छ ।
बर्दगोरिया । कैलालीको बर्दगोरिया गाउँपालिका वडा नम्बर १ मा रहेको बालकन्या माध्यमिक विद्यालयको आयोजनामा विद्याकी देवी सरस्वतीको पूजा आरधाना गरिएको छ ।
सरस्वती पुजा एवम वसन्त पञ्चमीका दिन सरस्वतीको पूजा गरे विद्या, बुद्धि बढ्ने विश्वास रहेको छ । सरस्वती पुजाको अवसरमा आयोजित कार्यक्रममा विद्यालयका छात्रछात्रा, विद्यालय व्यवस्थापन समिति, अभिभावक तथा विद्यालयका शिक्षक, शिक्षिकाहरुले विद्याकी देवी सरस्वतीको फोटोमा फुल अबिर तथा अगरबत्ती बालेर सरस्वती बन्दना गरी मनाएका छन्।
सरस्वती पुजाकै अबसरमा चित्रकला प्रदशनी गरिनुका साथै सास्कृतिक कार्यक्रम गरिएको थियो । सोही अवसरमा विद्यालयले गाएन प्रतियोगिता समेत गरेको प्रधानाध्यापक सुशिला कुवरले बताउनुभयो ।
कार्यक्रममा बर्दगोरिया शिक्षा शाखा प्रमुख नन्दा कुमारी भट्ट, कार्यपालिका सदस्य एवम वडा नम्बर १ कि वडा सदस्य सरस्वती विक, विद्यालय व्यवस्थापन समितिका अध्यक्ष हेमराज खतिवडा, लगाएतको उपस्थिति रहेको थियो।
विद्यालय नपठाइएका साना बालबालिकालाई सरस्वती पूजाकै दिनदेखि अक्षरारम्भ गराउने प्रचलन रहेको छ । सरस्वती पुजा अथवा बसन्त पञ्चमीका दिनबाट अक्षराम्भ गराएमा बालबालिका पढाईमा अब्बल बन्ने विश्वास गरिन्छ ।
चन्द्रमा जस्तो गोरो वर्ण भएकी तथा हातमा वीणा र पुस्तक लिएकी विद्याकी देवी सरस्वतीलाई भक्तजनले भारती, शारदा, हंसवाहिनी, जगन्माता, वागीश्वरी, कौमारी, वरदायिनी, बुद्धिधात्री, ब्रह्मचारिणी, चन्द्रघण्टा र भुवनेश्वरीजस्ता नामले पुकार्छन् ।
विद्या र सिर्जनाकी देवी भएकाले विशेषगरी साहित्यकार, कलाकार, पत्रकार, शिक्षक र विद्यार्थी आआफना कला–साधनाका वस्तु कलम, कापी, कुची र वाद्ययन्त्र आदिलाई सरस्वतीका रूपमा पूजा–आराधना गर्छन् भने तान्त्रिक तन्त्र सिद्धिका लागि तारादेवीका रूपमा आराधना गर्दछन् ।
सूर्य उत्तरतिर लागि दिन लामो हुने र वसन्त ऋतु प्रारम्भ हुने विश्वासका साथ यस दिनलाई ‘वसन्त पञ्चमी’ पनि भन्ने गरिन्छ । ऋग्वेदमा वाग्देवीका नामले प्रसिद्धि पाएकी ब्रह्माकी अधाङिगनी ब्रह्मायणीको पूजा उपासनाले सबै प्रकारको ज्ञान, सिद्धि र सद्बुद्धि प्राप्त हुने भएकाले सरस्वती पूजाको ठूलो महत्त्व छ ।
गान्धर्व पुराणमा यस दिन सरस्वतीको पूजा गरी विद्यारम्भ गरेमा सर्वसिद्धि प्राप्त हुन्छ भन्ने उल्लेख छ ।यस दिन विवाह, व्रतबन्ध, गुफा राख्ने र बेलविवाह जस्ता सामाजिक तथा धार्मिक कार्य गर्न साइत हेर्नु पर्दैन भन्ने विश्वास छ । यस दिन बालबालिकालाई शिक्षारम्भ गर्नुका साथै नाक, कान छेडिदिने गरिन्छ ।
सरस्वतीलाई चढाइएको सात गेडा अक्षता दातले नछोइ निलेमा विद्या र बुद्धि स्फूरण भई विद्यादेवीबाट चेतनाको ज्योति पाइन्छ भन्ने धार्मिक विश्वास छ ।
बर्दगोरिया । कैलालीको बर्दगोरिया गाउँपालिका वडा नम्बर २ मा रहेको मोडर्न मालिका नेशनल विद्या निकेतन स्कुलले बुधबार सरस्वती पुजासहित आफ्नो ५औ वार्षिक उत्सव मनाएको छ ।
सरस्वती पुजा एवम वसन्त पञ्चमीका दिन सरस्वतीको पूजा गरे विद्या, बुद्धि बढ्ने विश्वास रहेको छ । सरस्वती पुजाको अवसरमा आयोजित कार्यक्रममा विद्यालयका छात्रछात्रा, अभिभावक तथा विद्यालयका शिक्षक, शिक्षिकाहरुले विद्याकी देवी सरस्वतीको फोटोमा फुल अबिर तथा अगरबत्ती बालेर सरस्वती बन्दना गरी मनाएका छन्।
सरस्वती पुजाकै अबसरमा विविध सास्कृतिक कार्यक्रम गरिएको थियो । बार्षिकोत्सवको अवसरमा स्कुलले बिभिन्न खेलकुद, सांकृतिक तथा नृत्य प्रतियोगीताको गरेको थियो ।
सोही अवसरमा विद्यालयले आयोजना गरेका विभिन्न प्रतियोगिताका बिजेता तथा स्वमुल्यांकनबाट विभिन्न विद्या र क्षेत्रमा उत्कृष्ट विद्यार्थीलाई पुरस्कार वितरण गरिएको थियो । उनीहरूलाई कार्यक्रमका प्रमुख अथिति तथा वडा नम्बर २ का वडा अध्यक्ष गोविन्द विक र विशिस्ट अथिती बौनिया बजार व्यवस्थापन समिति अध्यक्ष अमर बहादुर बमले पुरस्कार वितरण गरेका थिए ।
कार्यक्रममा बोल्दै प्रमुख अथिती वडा नम्बर २ का वडा अध्यक्ष गोविन्द विकले बिद्यालयले शिक्षक, बिद्यार्थी र अभिभावक बिचको सुमधुर सम्बन्धले शिक्षण सिकाई प्रभावकारी हुने बताए । उनले शिक्षाको विकासका लागि सबैको साझा चासो आवस्यक भएको भन्दै गुणस्तरीय शिक्षामा पनि जोड दिए । उनले शिक्षा क्षेत्रमा निजि बिद्यालयले खेलेको भुमीका निकै महत्वपुर्ण रहेको बताए ।
कार्यक्रम विद्यालयाला प्रिन्सिपल गणेश शाहीको अध्यक्षतामा सम्पन्न भएको थियो ।
सुनसरी, माघ २६ गते । इटहरी उमहानगरपालिकाले सबै विद्यालयमा एउटै पोसाक लागू गर्ने निर्णय गरेको छ । बिहिवार सम्पन्न शिक्षा समितिको बैठकले नगर क्षेत्रभित्र रहेका निजी तथा सामुदायिक विद्यालयमा एउटै पोसाक लागू गर्ने निर्णय गरेको इटहरी उपमहानगरपालिकाका प्रमुख हेमकर्ण पौडेलले जानकारी दिनुभयो ।
इटहरीमा एक सय ३४ निजी र ३६ सामुदायिक गरी एक सय ७० विद्यालय छन् । अब नगर क्षेत्रका ६३ हजार पाँच सय २६ विद्यार्थी एउटै पोसाकमा विद्यालय जाने उहाँले बताउनुभयो । विद्यार्थीको पोसाकमा विविधता देखिएको भन्दै एकरूपता ल्याउनका लागि यस्तो निर्णय लिएको नगर शिक्षा समिति इटहरीले जनाएको छ ।
उपमहानर प्रमुख पौडेलले विद्यालयमा टाई हटाएर भादगाउँले टोपी लगाउने समेत निर्णय गरेको प्रमुख पौडेलले बताउनुभयो । त्यसैगरी उपमहानगरका कर्मचारी र जनप्रतिनिधिको सन्तानलाई अनिवार्य रुपमा सरकारी विद्यालयमा नै पढाउनुपर्ने निर्णय पनि गरेको उहाँले बताउनुभयो ।
विद्यालय मातहतमा कुनै स्टेशनरी बेच्न नपाइने र भर्ना शुल्क वापत एक पटक लिएपछि सो विद्यालयमा पढ्ने विद्यार्थी वापत पटकरपटक कक्षा चढ्दा भर्ना शुल्क लिन नपाइने निर्णय भएको प्रमुख पौडेलले बताउनुभयो । विद्यालय आफैँले किताब बेच्न नपाउने निर्णय गरेको पनि उहाँको भनाइ छ । साथै विद्यालय हाताभित्रबाट पाठ्यपुस्तक तथा शैक्षिक सामग्री बिक्री–वितरणमा रोक लगाएको हो ।
मुडा । कैलालीको बर्दगोरिया गाउँपालिका वडा नम्बर ६ बास्कोटीमा रहेको श्री महुन्याल माध्यमिक विद्यालयको आर्थिक वर्ष २०७९/८० को सामाजिक लेखा परीक्षण सार्बजनिक गरिएको छ । शुक्रबार शिक्षक अभिभावक संघका अध्यक्ष विनोद कुमार चौधरीको सभाध्यतामा सामाजिक लेखा परीक्षण सार्बजनिक गरिएको हो ।
विद्यालय व्यवस्थापन समिति अध्यक्ष धिरिन्द्रा जैशीको स्वागत मन्तव्यसंगै सुरु भएको कार्यक्रममा बर्दगोरिया गाउँपालिका शिक्षा, युवा तथा खेलकुद शाखा प्रमुख नन्दाकुमारी भट्ट विशिष्ट अथिति रहनुभएको थियो ।
कार्यक्रमलाई सम्बोधन गर्दै भट्टले महुन्याल मा.वि.लाई यस क्षेत्रकै नमूना विद्यालयका रूपमा स्थापित गर्नका लागि यहाँका समाजसेवी, बुद्धिजीवी, राजनीतिक दल, शिक्षक शिक्षिका तथा अभिभावकहरु विशेष सहयोग र साथ अपरिहार्य भएको बताउनुभयो । उहाँले अभिभावकलाई आफ्नो ठाउँको विद्यालय र विद्यार्थीको अवस्थाप्रति सदैव गम्भीर हुन आवश्यक रहेको बताउनुभयो ।
कार्यक्रममा विद्यालयकि प्रधानाध्यापक चन्द्रीका जोशीले सामुदायिक विद्यालय महुन्याल मा.वि.लाई प्राविधिक धारसङ्गै अगाडि बढाएर दक्ष जनशक्ति उत्पादनमा समेत विद्यालयले महत्त्वपूर्ण भुमिका निर्वाह गरेको बताउनुभयो ।
उहाँले शिक्षक, अभिभावक, विद्यार्थी सबैको सहयोग र हातेमालोबाट विद्यालयको गुणस्तर माथी उकास्न सकिने हुँदा यसप्रति सचेत रहन सुझाव समेत दिनुभयो ।
कार्यक्रममा विद्यालयका शिक्षक पुष्कर सुनारले आर्थिक वर्ष २०७९/८० को २ करोड ३० लाख ४१ हजार ९३४ रुपैयाँ बराबरको आय र२ करोड २३ लाख ६३ हजार ४३५ रुपैयाँ व्यय विवरण सहितको प्रतिवेदन प्रस्तुत गरेका थिए ।
काठमाडौँ । राष्ट्रिय परीक्षा बोर्डले चालु शैक्षिक सत्रको कक्षा १२ को वार्षिक परीक्षा आगामी वैशाखको पहिलो सातादेखि सञ्चालन गर्ने भएको छ ।
बोर्डले आज सूचना जारी गर्दै आफ्नो वार्षिक कार्यतालिका सार्वजनिक गरेको हो । जसमा १२ को वार्षिक परीक्षा २०८१ को वैशाख पहिलो हप्तादेखि सञ्चालन गर्ने उल्लेख छ ।
परीक्षाको नतिजा प्रकाशित भएको ४५ दिनभित्रमा पूरक परीक्षा गर्ने बोर्डको कार्यतालिका छ । नतिजा भने २०८१ को साउन तेस्रो साताभित्र सार्वजनिक गर्ने बोर्डले जनाएको छ ।
कक्षा ११ को परीक्षा विद्यालयहरूले २०८१ को जेठ पहिलो सातासम्ममा सम्पन्न गर्नुपर्ने छ । कक्षा ११ को रजिस्ट्रेसन फाराम पुस १५ गतेबाट खुला गरेर माघ १५ गतेसम्म भर्ने समयावधि तोकिएको छ ।
कक्षा १२ को परीक्षा फाराम भने पुस १ गतेबाट खुला गरी माघ १५ गतेभित्र भरेर अनलाइनमार्फत बुझाइसक्नुपर्ने बोर्डको कार्यतालिकामा उल्लेख छ ।