बर्दगोरियामा यसरी मनाईयो धान दिवस [ फोटोफिचर ]

बौनिया । धानमा जैविक विविधताको उपयोग, आयात प्रतिस्थापनमा सहयोग भन्ने नाराका साथ कैलालीको बर्दगोरिया गाउँपालिकामा १९ औ राष्ट्रिय धान दिवस मनाइएको छ ।

बर्दगोरिया गाउँपालिका कृषि विकास शाखा र अखिल नेपाल किसान महासंघ कैलालीको सयुक्त आयोजनामा दिवश मनाईएको हो ।

एमाले कैलाली जिल्ला सचिब डेजि पाण्डेको सभाध्यक्षतामा भएको कार्यक्रमको प्रमुख अतिथिका रूपमा नेकपा एमाले सुदुरपश्चिम इन्चार्ज लेखराज भट्ट रहेका थिए । कार्यक्रममा बर्दगोरिया गाउँपालिका अध्यक्ष कर्ण बहादुर कुवरले स्वागत मन्तव्य राखेका थिए ।

असार १५ का दिन कामको चटारोले थकित भएका किसान शक्ति प्राप्तिका लागि दही च्यूरा खान्छन् । यसबेला दही च्यूराले शरीरमा शीतलता भई शक्ति सञ्चय हुने विश्वास गरिन्छ ।

विसं २०६१ मङ्सिर २९ गते मन्त्रिस्तरीय निर्णय गरी २०६२ साल असार १५ गतेदेखि राष्ट्रिय धान दिवस मनाउन थालिएको हो।

कृषि प्रधान देश भएकाले नेपालका अधिकांश मानिसको पेसा खेतीपाती हो। किसान वर्षभरका लागि छाक जुटाउन यो महिना खेतीमा व्यस्त हुन्छन्। आजका दिन असारे भाकामा लोकदोहोरी गाउँदै छुपु छुपु हिलोमा धान रोपिन्छ।

असारमा एकपटक हिलोमा पस्नै पर्ने मान्यता पनि नेपाली समाजमा रहेको छ। औपचारिकरूपमा सरकारले निर्णय गरेर धान दिवस घोषणा गर्नुअघि नै नेपालमा असार १५ गते दहीच्युरा खाने संस्कृति प्राचीनकालदेखि नै रहिआएको छ ।