काठमाण्डाै, ३० भदाै २०७८ ।
शेयर बजार आज बुधवार पनि घटेको छ । नेप्से आज ४० दशमलव २६ अङ्कले घटेर दुई हजार आठ सय ८९ विन्दुमा झरेको छ ।
बजार खुलेको केही बेर बजार बढे पनि त्यसपछि घट्न सुरु भएको थियो । आज बैंक, व्यापार, जलविद्युत्, बीमा, फाइनान्स, उत्पादनसहित सबै समूहको शेयर घटेको छ ।
आज हिमालयन ऊर्जा विकास कम्पनी र गुराँस फाइनान्सको शेयर पाँच प्रतिशतभन्दा धेरैले घटेको छ । समग्र बजार घटे पनि मनकामना स्मार्ट लघुवित्त कम्पनीको शेयर आठ प्रतिशतभन्दा धेरैले बढेको छ ।
आज दुई सय २२ कम्पनीका शेयर कारोबार भएकोमा जम्मा १६ वटा कम्पनीको शेयर मात्रै सामान्य बढेको छ ।
आज एक करोड पाँच लाख कित्ता शेयर पाँच अर्ब ३५ करोड रुपैयाँमा कारोबार भएका छन् । सबैभन्दा धेरै अरुण भ्याली हाइड्रोको २२ करोड १४ लाख रुपैयाँको शेयर किनबेच भएको छ । उज्यालाे अनलाइनबाट
बागलुङ, ३० भदौ २०७८ ।
नेपाल कम्युनिष्ट पार्टी माओवादी केन्द्र निकट भातृ संगठनहरुको जैमिनी नगर कमिटि गठन भएको छ । मंगलबार माओवादी केन्द्रका केन्द्रिय सदस्य तथा बागलुङ जिल्ला ईन्चार्ज बलावती शर्माको प्रमुख आतिथ्यतामा कुश्मिसेरामा सम्पन्न बैठकले बिभिन्न भातृ संगठनको नगर कमिटि गठन गरेको हो ।
भेलाले मिना परियारको संयोजकत्वमा ९ सदस्यीय साँस्कृतिक संगठन, लालमाया पुनको संयोजकत्वमा २१ सदस्यीय अखिल नेपाल महिला क्रान्तिकारी, कुल बहादुर पुनको संयोजकत्वमा ३१ सदस्यीय वाइसिएल र आशिष थापाको संयोजकत्वमा २९ सदस्यीय अनेरास्ववियु क्रान्तिकारी गठन भएको नेकपा माओवादी केन्द्र जैमिनी ईन्चार्य लाल बहादुर परियारले जानकारी दिनुभयो ।
माओवादी केन्द्र जैमिनीका संयोजक झम्मन पाण्डेको अध्यक्षतामा भएको कार्यक्रममा नव गठित कमिटिका संयोजकहरुलाई बधाई दिँदै संगठन सुदृृढिकरणको बिषयमा छलफल भएको थियो ।
बागलुङ, ३० भदौ २०७८ ।
सुनौलो बागलुङ संस्थाले बिरामीलाई नगद सहयोग गरेको छ । सुगर लगायत अन्य रोगबाट पीडित जैमिनी नगरपालिका ८ छिस्तीका विरेन्द्र पुन लाई संस्थाले नगद सहयोग गरेको हो ।
संस्थाको वैदेशिक बिभागका कोषाध्यक्ष चित्र श्रीसको पहलमा संकलित ५० हजार रुपैयाँ नगद सोमबार पीडितलाई सहयोग गरिएको संस्थाका पूर्व अध्यक्ष तथा सल्लाहकार शिव श्रीसले जानकारी दिनुभयो ।
पीडित पुुनको आर्थिक अवस्था कमजोर भएपछि संस्थाको तर्फबाट पुनको परिवार मनकुमारी पुनलाई नगद रकम हस्तान्तरण गरिएको थियो ।
जैमिनीको प्रगति समिक्षा कार्यक्रम सम्पन्न, ९६ प्रतिशत भौतिक र ९१ प्रतिशत आर्थिक प्रगति
सुजन प्रेमी
बागलुङ, २८ भदौ २०७८ ।
जैमिनी नगरपालिकाले आर्थिक बर्ष २०७७।७८ को बार्षिक प्रगति समिक्षा कार्यक्रम गरेको छ । सोमबार जैमिनी नगरपालिकाको सभाहल कुश्मिसेरामा नगरपालिकाका सम्पूर्ण गतिविधिहरुको बार्षिक प्रगति समिक्षा गरिएको हो ।
११ वटा विषयगत शाखाका अधिकृत तथा संयोजकहरुले पेश गरेको प्रतिवेदन अनुसार जैमिनीमा भएका काम कारवाहीहरु सन्तोषजनक देखिएको छ । शिक्षा, स्वास्थ्य, आर्युवेद, कृषि, पशु, पञ्जिकरण, विपद् तथा सामाजिक विकास, योजना, प्रशासन तथा लेखा, प्रधानमन्त्री रोजगार लगाएतको प्रतिवेदन प्रस्तुत भएकोमा सहभागिहरुले योजना कार्यन्वयन र अनुगमनमा प्रभावकारिता नभएको सुझाव दिएका थिए ।
जैमिनी नगरपालिकाको शिक्षा शाखाले ७१ दशमलव १४ प्रतिशत प्रगति गरेको देखिएको छ जसमा दिवा खाजा कार्यक्रम तथा शैक्षिक सामग्रीको व्यवस्था हुनुले अपेक्षित उपलब्धि पाइएको छ । संघ र प्रदेशको कानुनका कारण कतिपय कामहरु अश्पष्टता हुँदा प्रभावकारी कार्य प्रगति गर्न नसकिएको जैमिनी नगरपालिकाका शिक्षा उप सचिव खेम प्रसाद आचार्यले बताउनुभयो ।
नगरपालिकाका ४ सय ६० वटा योजनामध्ये ३ सय ५३ वटा योजना तथा कार्यक्रमको शत प्रतिशत काम भएको छ भने ३३ वटा योजना तथा कार्यक्रम कार्यन्वयन हुन नसकेको पाइएको छ । जैमिनी नगरपालिकाले आर्थिक बर्ष २०७७।७८ मा ९६ प्रतिशत भौतिक प्रगति र ९१ प्रतिशत वित्तिय प्रगति गरेको योजना अधिकृत पे्रम प्रसाद सापकोटाले जानकारी दिनुभयो । जैमिनी नगरपालिकामा सञ्चित कोषको आम्दानी र खर्चको आधारमा चालु तथा पुजिगत खर्च मध्ये कुल ८३ प्रतिशत खर्च भएको छ ।
नगरपालिकामा बर्खाका कारण बिशेषगरी बाटोघाटोमा बढि क्षति हुने गरेको ईन्जिजियर विवेक सापकोटाले बताउनुभयो । नगरपालिकाका अधिकांश ठाउँमा कच्चि बाटो भएको र बर्षातमा बाढी पहिरो आउँदा प्राविधिकहरुको कार्यभार बढेको उहाँको भनाई छ । गत आर्थिक वर्षमा २३ किलोमिटर नयाँ सडक निर्माण भएको छ । ९ सय ४७ मिटर पक्की नालि निर्माण भएको र १ हजार २०० मिटर कालोपत्रे गरिएको सापकोटाले बताउनुभयो ।
नगरपालिकाले गर्ने खर्च देखिने गरी बाटोमा लगानी गरिएको भएपनि अपेक्षित उपलब्धी कम भएको देखिएको छ । यसको मुख्य कारण बर्षातको भेलबाढी सहित संरक्षणको अभाव पनि रहेको छ ।
साना र फुटकर योजनाले कार्यभार र व्ययभार बढेको तर उपलब्धी कम देखिने गरेको लेखा अधिकृत सुर्य बहादुर विकको भनाई रहेको छ । कार्यक्रममा आम्दानी तथा खर्चको विवरण, शिर्षक, श्रोत तथा कार्यन्वयनको बारेमा जानकारी दिदै उहाँले नीति र विधिलाई अक्षरत कार्यन्वयन गर्न चुनौती भएको बताउनुभयो ।
नगरपालिकाले कृषि तथा पशु कार्यक्रममा पनि उपलब्धि हासिल गरेको छ । तर यो अझै अपेक्षाकृत नभएको र कृषि तथा पशु पालनमा नागरिकहरुको आकर्षण बढाउनुपर्ने पशु शाखा अधिकृत कृष्ण प्रसाद ढकालले धारणा राख्नुभयो ।
प्रधानमन्त्री रोजगार कार्यक्रमले आर्थिक बर्ष २०७७र७८ मा जैमिनी नगरपालिका भरीका २ हजार ५ सय ५० जना सुचिकृत मध्ये ३ सय ९६ जनालाई रोजगार दिएको छ । रोजगार पाएका ३ सय ९६ जनाले २४ वटा योजनामा २४ हजार ३ सय १४ दिन बराबरको काम गरेका छन् । जस बापत १ करोड २५ लाख ७० हजार ३ सय ३८ रूपैयाँ भुक्तानी भएको रोजगार संयोजक सुरेश पुनले बताउनुभयो ।
न्युनतम रोजगारीको राज्यले ग्यारेन्टी गरेपनि कार्यक्रम कार्यन्वयनमा भने चुनौति देखिएको छ । जैमिनी नगरपालिकामा प्रधानमन्त्री रोजगार कार्यक्रमबाट आएको कुल बजेटको आधा भन्दा बढि रकम फिर्ता गएको छ । विधि र पद्धति अनुसार काम गर्न चुनौति देखिएको यस कार्यक्रमको प्रमुख समस्या पारिश्रमिक कम हुनु र श्रमिकहरुको वर्गिकरण नहुनु रहेको रोजगार संयोजक पुनको भनाई छ ।
नगरपालिकाको बार्षिक प्रगति समिक्षा कार्यक्रममा उठेका जिज्ञासा सहितलाई सम्बोधन गर्दै नगर प्रमुख ईन्द्रराज पौडेलले जैमिनीलाई समृद्ध बनाउन आफु बाट नै सुरुवात गर्नुपर्ने बताउनुभयो । आफ्नो दायित्व सम्झेर सबैले काम गरे नगरपालिकाको काम प्रभावकारी हुने भन्दै उहाँले सबैले मिलेर काम गर्न अनुरोध गर्नुभयो ।
कर्मचारी समायोजन आदेश कारण भन्दै लाेकसेवाले शाखा अधिकृतको नतिजा प्रकाशन स्थगित गर्याे
काठमाडौं,२८ भदौ २०७८ ।
लोकसेवा आयोगले २०७६ सालमा विज्ञापन गरेको व्यवस्थापिका संसद, परराष्ट्र, प्रशासन र लेखापरीक्षण सेवाका शाखा अधिकृतको नतिजा प्रकाशन स्थगित गरेको छ ।
सर्वोच्च अदालतले कर्मचारी समायोजन सम्बन्धमा दिएका आदेशलाई कारण देखाउँदै आयोगले सबै परीक्षा लिइसकेको शाखा अधिकृतको योग्यताक्रम प्रकाशन र सिफारिस स्थगित गरेको हो । ‘आयोगबाट प्रकाशित वि नं १६६९४–१६७००/०७६–७७ सम्मका व्यवस्थापिका संसद, परराष्ट्र, प्रशासन र लेखा परीक्षण सेवाका राजपत्रांकित तृतीय श्रेणी शाखा अधिकृत वा सो सरह (अप्राविधिक) पदको योग्यताक्रम प्रकाशन तथा सिफारिस स्थगित भएको व्यहोरा आयोगको मिति २०७८/०५/२८ को निर्णयअनुसार सम्बन्धित सबैको जानकारीको लागि यो सूचना प्रकाशन गरिएको छ’ आयोगको सूचनामा भनिएको छ ।
लोक सेवा आयोगले मिति २०७६ मंसिरमा शाखा अधिकृतमा बढुवा तथा खुला समेत गरी सामान्य प्रशासन समूहका ५६० रिक्त पदमा पदपूर्तिको लागि विज्ञापन प्रकाशन गरेको थियो । उक्त विज्ञापनमध्ये ३० प्रतिशत बढुवातर्फ छुट्याएको १६८ पद सोही वर्ष नै पदपूर्ति भइसकेको थियो । बाँकी खुला तथा समावेशीतर्फ छुट्याएको ३९२ पदको परीक्षा भने कोभिड-१९ का कारण ढिलो हुँदा भदौ ५ गतेमात्र सबै चरण सम्पन्न भएको हो ।
यसअघि प्रदेश र स्थानीय तहमा समायोजन भएका शाखा अधिकृतहरुलाई उनीहरुले रोजेको संघमा समायोजन गर्न सर्वोच्चले आदेश दिएसँगै लोकसेवा आयोगको परीक्षाका सम्पूर्ण चरण पार गरी अन्तिम नतिजाको पर्खाइमा रहेका संसद, परराष्ट्र, प्रशासन र लेखापरीक्षण समूहका परीक्षार्थी समस्यामा परेका छन् । समायोजनमा परेका ३४ शाखा अधिकृतहरुले संघमा रिक्त दरबन्दी हुँदाहुँदै आफूहरुलाई प्रदेश र स्थानीय तहमा समायोजन गरिएको भन्दै गत साउन २६ मा सर्वोच्च अदालतमा रिट दायर गरेका थिए । सो रिटमा अन्तरिम आदेश दिँदै सर्वोच्चले प्रकाशित भैसकेको विज्ञापनमा उक्त संख्यामा पदपूर्ति नगर्न आदेश जारी गरेको थियो ।
त्यस्तै भदौ ४ मा पनि सर्वोच्चले डेढ सय भन्दा धेरै समायोजित शाखा अधिकृतहरुको रिटमा सोही बमोजिमको आदेश गरेको थियो । यसैगरी भदौ २० मा सर्वोच्चले अर्को अन्तरिम आदेश जारी गर्दै उल्लेखित समायोजित शाखा अधिकृतहरुलाई संघमा मिलान गर्ने विषय नटुंगिएसम्म नयाँ पदपूर्तिको कार्य नगर्न अन्तरिम आदेश दिएको थियो । सर्वोच्चको अन्तरिम आदेशसँगै समायोजित शाखा अधिकृतहरुको समायोजन उल्टिएसँगै यसअघिको सरकारले गरेको कर्मचारी समायोजन असफल भएको प्रमाणित भएको प्रशासनविदहरु बताउँछन् ।
सुचना हेर्नुहाेस्
बागलुङ, २८ भदौ २०७८ ।
बागलुङको जैमिनी नगरपालिकाका विद्यालयहरु भौतिक रुपमा नै खुल्ने भएका छन् । आइतबार बसेको सरोकारवालाहरुको बैठकले सर्त सहित भौतिक उपस्थितिमा विद्यालय खुलाउने निर्णय गरेको हो ।
सोमबार देखि एउटा कक्षामा बढीमा २५ जना र एउटा बेन्चमा बढीमा २ जना विद्यार्थी राखेर पठनपाठन गराउने र बिचमा छुट्टी नगरी बढीमा दैनिक ५ घण्टा विद्यालय सञ्चालन गर्न विद्यालयलाई सूचना गरिएको जैमिनी नगरपालिकाका शिक्षा शाखा संयोजक खेम प्रसाद आचार्यले जानकारी दिनुभयो । शैक्षिक सत्रको सुरुवात देखिनै जैमिनीमा कोरोनाको असरले विद्यालय बन्द हुँदा विद्यार्थीहरुको शिक्षण सिकाइमा प्रत्यक्ष असर परेकाले स्वास्थ्य सुरक्षा मापदण्ड अपनाएर विद्यालय खोल्ने निर्णय गरिएको उहाको भनाई छ ।
विद्यार्थी धेरै भएका विद्यालयहरुले आलोपालो गरी सञ्चालन गर्नुपर्ने, अनिवार्य मास्क, सेनिटाइजर तथा साबुन पानीले हात धुने ठाउँको व्यवस्था सहित अनिवार्य प्रयोग गराउनुपर्नेछ । प्रत्येक सुरु कक्षाको १५ मिनेट विद्यार्थीहरुलाई कोरोना सम्बन्धी सचेतना दिनुपर्ने नगरपालिकाले नियम बनाएको छ ।
काठमाडौं, २८ भदौ २२०७८ ।
मनसुनको अवधि जुनदेखि सेप्टेम्बर पूरा नहुँदै (चार महिना नपुग्दै) मुलुकमा सरदरभन्दा बढी वर्षा भएको छ । अझ उत्तरी भूभागमा बढी वर्षा भएको मौसम विज्ञान विभागले जनाएको छ ।
मुलुकका विभिन्न मुख्य २० वर्षा मापन केन्द्रलाई आधार मानेर निकालिएको औसत मौसमी विवरणअनुसार उक्त चार महिनामा मुलुकमा सरदर एक हजार ४०३ मिलिमिटर पानी पथ्र्यो तर अहिले १८ दिनअघि नै एक हजार ५२७ मिलिमिटर पानी परिसकेको छ ।
मौसम विज्ञान विभागको जलवायु विष्लेषण शाखा प्रमुख, वरिष्ठ मौसमविद् डा इन्दिरा कँडेलका अनुसार सेप्टेम्बर १२ अर्थात् आजसम्मको विष्लेषण गर्दा सरदर एक हजार २६८ मिलिमिटर वर्षा हुनुपर्ने थियो तर औसत विवरणअनुसार २६९ मिलिमिटर बढी पानी परिसकेको छ । यो सरदर वर्षाको अनुपातमा आजसम्मको वर्षा विष्लेषण गर्दा १२० दशमलव ४ प्रतिशत हो । उहाँका अनुसार सरदर वर्षाको अनुपात भने ९० देखि ११० प्रतिशतलाई मानिन्छ ।
काठमाडौँमा पनि यसपाली बढी वर्षा भइसकेको छ । विभागका अनुसार काठमाडौँमा आजसम्म सरदर एक हजार ७२ दशमलव ५ मिलिमिटर वर्षा हुनुपर्नेमा आजसम्म एक हजार ३५१ दशमलव २ मिलिमिटर पानी परिसकेको छ । मनसुनको अवधि ९सेप्टेम्बर अन्तिम० सम्म एक हजार १७६ मिलिमिटर पर्नुलाई सरदर वर्षा मानिन्छ । अहिले नै वर्षा नाघिसकेको छ । काठमाडौँमा आजसम्मको तुलना गर्दा १२६ प्रतिशत पानी परिसकेको छ । चार महिनाको मनसुन अवधिको औसत निकाल्दा भने यो ११५ प्रतिशत हुन आउँछ ।
प्राप्त विवरणअनुसार जोमसोममा सबैभन्दा बढी वर्षा भएको छ । सरदर १३७ दशमलव १ मिमिमिटर पानी पर्नुपर्नेमा त्यहाँ ३३९ दशमलव ३ मिलिमिटर पानी परिसकेको छ । कँडेलका अनुसार यो सरदरको २५४ दशमलव ८ प्रतिशत हो । यसपाली दोस्रो बढी पानी पर्ने अर्को केन्द्र भैरहवा हो । त्यहाँ १४० दशमलव ७ प्रतिशत वर्षा भएको छ । उहाँका अनुसार आजसम्म एक हजार २४९ दशमलव ८ प्रतिशत सरदर वर्ष हुनुपर्नेमा एक हजार ९२५ मिलिमिटर पानी परिसकेको छ ।
मुलुकमा यसपाली औषधभन्दा बढी वर्षा हुने आँकलनकै बीच भारी वर्षापछिको बाढी, पहिरो र डुबानले ७१ जिल्लालाई नराम्ररी प्रभावित बनायो । मुख्यतः सिन्धुपाल्चोक, मनाङ, पाल्पामा, कास्कीमा, दाङ, पर्वतलगायत एक दर्जन जिल्ला मानवीय र भौतिक क्षतिका दृष्टिले बढी प्रताडित छ । सरकारले मनाङ र सिन्धुपाल्चोकलाई त विपद् सङ्कटग्रस्त जिल्ला नै घोषणा गरेर आवश्यक पुनरुउत्थानका कार्य अघि बढाइसकेको छ ।
मनसुनजन्य घटना (बाढीपहिरो र डुबान) का घटनामा मात्रै यसपाली मुलुकभर १३० को मृत्यु भयो भने अझै ४१ जना हराइरहेका छन् । सबैभन्दा बढी सिन्धुपाल्चोकमा मानवीय क्षति भएको छ । उक्त जिल्ला गत वर्ष पनि विपद्का दृष्टिले सबैभन्दा बढी प्रभावित थियो ।
जल तथा मौसम विज्ञान विभागले गत वैशाखमै मनसुन अवधिमा सुदुरपश्चिम, कर्णाली गण्डकी, वाग्मती प्रदशेका अधिकांश स्थान तथा प्रदेश १ को मध्य तथा पश्चिम पहाडी, हिमाली भूभागमा सदरदभन्दा बढी (३५ देखि ६५ प्रतिशत) वर्षा हुने अनुमान गरेको थियो ।
उच्च हिमाली क्षेत्रमा भने ५५ देखि ६५ प्रतिशत वर्षा हुने आँकलन गरिएको थियो । प्रदेश १ को तराई र प्रदेश २ को पूर्वी जिल्लामा सरदरभन्दा कम वर्षा हुने अनुमान गरिएको थियो । विभागले विश्व मौसम सङ्गठनको विश्वभर तथा क्षेत्रीयस्तरको जलवायु सूचना उत्पादन गर्ने केन्द्रको हावापानी प्रारुप, जल तथा मौसम विज्ञान विभागको मनसुनी वर्षा र दक्षिण एसियाली जलवायु दृष्टिकोण मञ्चको आँकलनका आधारमा उक्त निष्कर्ष निकाल्ने गरिन्छ ।
नेपालको वर्षाको मनसुनी प्रणालीमा प्रभाव पार्ने पूर्वी प्रशान्त महासागरमा विकसित हुने ‘एन्सो’, हिन्द महासागरमा विकसित हुने दुई ध्रुवीय प्रणालीको अवस्था, जलवायु प्रारुपको मनसुन अवधिको आँकलन, युरोप तथा एसियामा गत हिउँद तथा प्रिमनसुनको अवधिमा परेको हिउँ, अन्तरऋतु परिवर्तनशिलताका कारकलाई समेत मध्यनजर गरी उक्त आँकलन तयार पारिन्छ । यसपाली गएको वैशाखमै आँकलन गरिएको थियो । त्यसमा नेपाल, भारत, म्यान्मालगायत नौ देशका मौसमविद् सहभागी थिए ।
के अब मौसम खुलेकै हो ?
ठूलाठूला विपद्का घटना निम्तिएपछि पछिल्ला केही दिनदेखि विस्तारै मौसम सफा हुँदै गएको हो कि भन्ने महसुस गराएको छ । कर्णाली प्रदेशबाहेक आज धेरै ठाउँमा घाम लागिरहेको छ । के अब मौसम खुलेकै हो त ? यसपालीको विपद् यति नै हो त ? आम सर्वसाधारणमा प्रश्न खेलिरहेको छ । त्यही प्रश्न मौसमविद्सँग राख्दा त्यो अनुमान गर्न अझै हतारो हुने प्रतिक्रिया प्राप्त भएको छ । उहाँहरुका अनुसार अझै विपद् टरिसकेको छैन ।
जल तथा मौसम विज्ञान विभागका वरिष्ठ मौसमविद् सुमनकुमार रेग्मी भन्नुहुन्छ, “मनसुन नसकिँदासम्म जोखिम कायमै रहन्छ, खुलेको जस्तो देखिए पनि कुनै पनि बेला मनसुन एक्टिभ भएर भारी वर्षा हुनसक्छ, नियमित अपडेटमा रहनुपर्छ ।”
यसपालीको मनसुनका समयमा मुलुकका धेरै जसो भूभागमा सरदरभन्दा बढी वर्षा हुने आँकलन गरिएको थियो । सोहीअनुसार नै वर्षा भएको जनाइएको छ । नेपालमा यसपाली मनसुन दुई दिन ढिला गरी गएको जेठ २८ गते भित्रिएको थियो । आगामी असोज १७ को आसापास मनसुन बाहिरिनेछ ।
जेठ ३० गतेदेखि देशैभरि सक्रिय भयो । त्यसको अर्को दिनबाटै भारी वर्षा सुरु भई जनजीवन प्रभावित बनायो । सुरुआती वर्षाले मनाङ र सिन्धुपाल्चोकलगायत जिल्लामा ठूलो जनधनको क्षति गरायो । असार १ र असार १६ गते पुनःभारी वर्षा हुँदा सिन्धुपाल्चोकमा दोहोरिएर क्षति भयो । अघिल्लो हप्ता तराईका जिल्लामा भारी वर्षा हुँदा बाढी र डुबानको समस्या निम्तियो ।
गृहमन्त्रालयबाट प्राप्त विवरणअनुसार सिन्धुपाल्चोकमा अहिलेसम्म छ जनाको मृत्यु भएको छ भने २० बेपत्ता भएका छन् । सिन्धुपाल्चोकको मेलम्ची नगरपालिकामा मात्रै २४७ घर बाढीले भत्काएको छ । कूल एक हजार ७०० रोपनीभन्दा बढी जमिन लगेको छ । जग्गामा मात्रै तीन अर्ब बढीको क्षति भएको प्रारम्भिक अनुमान छ ।
उता जिल्लाको हेलम्बु गाउँपालिकामा २२७ घर बग्यो । कूल दुई हजार १०० रोपनी बढी जग्गा लगेको विवरण प्राप्त छ । यस्तै पाल्पामा छ, कास्कीमा सात, दाङमा १० र पर्वतमा १३ जनाले ज्यान गुमाएको मन्त्रालयले जनाएको छ ।
यसपाली मनसुनजन्य विपद्का कारण ७१ जिल्ला प्रभावित भएको छ । जल तथा मौसम विज्ञान विभाग मौसम पूर्वाधनुमान महाशाखाका मौसमविद् समीर श्रेष्ठ अहिले मुलुकभर मौसम सामान्य बदली रहे पनि कर्णाली प्रदेशमा छिटफुट वर्षा भइरहेको जानकारी दिनुहुन्छ । “सोमबार पनि मौसम सामान्य नै छ, मङ्गलबार केही बदली हुनसक्छ”, श्रेष्ठले रासससँग भन्नुभयो । उहाँले पनि तत्कालै भारी वर्षाको सम्भावना भने नदेखिएको बताउनुभयो । यद्यपि मनसुन नबाहिरिँदासम्म कुनै पनि बेला बदली हुने श्रेष्ठको भनाइ छ ।
वैशाख यताका घटना र मानवीय क्षति
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार गएको वैशाख यता कूल एक हजार ७६२ विपद्का घटना भएको छ । ती घटनाबाट २३४ जनाको मृत्यु भएको छ । यसमा बाढीपहिरो र डुबान बाहेकका विपद्जन्य घटनासमेत समावेश छ । तीन घटनामा ४१ जना हराइरहेका छन् भने ४६४ घाइते भए । कूल दुई हजार २७८ परिवार प्रभावित छन् । कूल सात अर्ब ७७ करोडको क्षति भएको अनुमान गरिएको छ ।
जसमा सबैभन्दा बढी ६७९ आगलागीका घटना भए । यद्यपि मानवीय क्षतिका हिसाबले भने सबैभन्दा बढी पहिराबाट ७७ ले ज्यान गुमाएका छन् । सबैभन्दा बढी बाढीमा परेर ३२ बेपत्ता भएका छन् ।
प्राप्त विवरणअनुसार आगलागीमा परी १४, पहिरामा ७७, बाढीबाट ३८, अविरल वर्षाका कारण १६, चट्याङबाट ४८, सर्पको टोकाइबाट १६, डढेलोबाट तीन, हावाहुरीका कारण एक र जनावरको आक्रमणबाट २१ जनाले ज्यान गुमाएका छन् ।
पर्वत, २७ भदौ २०७८ ।
विगत १६ वर्षअघि रोजगारीका लागि मलेसिया गएका पर्वतका एक युवा बेपत्ता भएका छन् । पर्वतको महाशिला गाउँपालिका–१ होश्राङ्दीको अर्गाउदीका सर्वजित सुनार विगत १६ वर्षदेखि परिवारबाट सम्पर्कविहीन हुनुभएको हो ।
साविकको होश्राङ्दी गाविस–७ अर्गाउदीका उमाराज विक र विष्णुमाया विकका साइला छोरा सर्वजीत विक विगत १६ वर्षदेखि सम्पर्कविहीन भएको परिवारले जनाएको छ ।
विसं २०६२ मा मलेसिया जानुभएका सर्वजीत हालसम्म परिवारको सम्पर्कमा नआएपछि परिवारले खोजी गरिदिन अपिल गरेको छ । छोरालाई हालसम्म सबै ठाउँमा खोजतलास गर्दा पनि कुनै अत्तोपत्तो नभएपछि खोजी गरिदिन आमा विष्णुमाया विकले सबैलाई अपिल गर्नुभएको छ । राम्रो लाउने मीठो खाने सपना बोकेर धन कमाउने आशामा विदेश गएको छोरा बेपत्ता भएपछि आफूहरु अत्यन्त पिरमा परेको उहाँले बताउनुभयो । उहाँले भन्नुभयो, “घरको आर्थिक समस्याले छोरालाई विदेश पठायौँ तर १६ वर्षसम्म छोराको अत्तोपत्तो नपाउँदा छोराकै पिरले हामीलाई दिनको भोक र रातको निद हराएको छ ।”
मलेसिया गएको चार वर्षसम्म छोराले फोन गरिने गरेपनि त्यसपछि कुराकानी हुन छाडेको उहाँले बताउनुभयो । अहिले कहाँ र कस्तो अवस्था छ, कुनै आपत्विपद परेर हो कि अथवा केही भयो कि ? छोराको अवस्था थाहा पाउन नसकेपछि हामी सारै सस्यामा परेका छौँ । लामो समयसम्म पनि छोरा घर नफर्केपछि छोरा आमाबाबु चौबिसै घण्टा पिरोलिने गरेको बेपत्ता सर्वजीतकी भाउजु सम्झना विकले बताउनुभयो ।
सोह्र वर्षअघि काठमाडौँ मेभ मेनपावरबाट मलेसिया गएका सर्वजीत मलेसियाको सेलेङ्गर भन्ने ठाउँमा (निलेइ कम्पनी) हेन गल्वस कम्पनीमा काम गरेको सर्वजीतका आफन्त विष्णुराम विकले बताउनुभयो । चार वर्षसम्म सोही कम्पनीमा काम गरेको र त्यसपछि त्यहीँबाट सम्पर्कविहीन भएको उहाँको भनाइ छ । सर्वजीतलाई विदेश पठाएको मेनपावर अहिले बन्द भएको छ । हालसम्म धेरै खोजी गर्दा पनि सर्वजीतको अवस्था पत्ता नलागेको विकले बताउनुभयो । विक परिवार अझै पनि छोरो घर फर्किन्छ भन्ने आशामा रहेका छन् । छोरा गएको ठाउँ मलेसियालगायत सबैतिर खोजिदिन परिवारले सबैसँग आग्रह गरेको छ ।
नेपाली कांग्रेसमा युवाहरुको चासोः क्षेत्रीय सभापतिमा दल बहादुर श्रीस रानाको उम्मेदवारी दावी
बागलुङ, २७ भदौ २०७८ ।
नेपाली कांग्रेस क्षेत्रीय सभापतिमा युवा नेता दल बहादुर श्रीस रानाले आफ्नो उम्मेदवारी दिनुहुने भएको छ । बागलुङ प्रतिनिधि सभा क्षेत्र नं १ प्रदेश (ख) बाट बागलुङको जैमिनी नगरपालिका १० राङ्खानीमा जन्मनुभएका श्रीस रानाले सभापतिमा उम्मेदवारी दिन लाग्नुभएको हो ।
नेपाल तरुण दलको वर्तमान क्षेत्रीय सभापति समेत रहनुभएका युवा नेता श्रीसले सम्पूर्ण युवाहरुको प्रतिनिधित्व गर्दै क्षेत्रीय सभापतिमा आफ्नो उम्मेदवारी दावी रहेको जानकारी दिनुभयो । “नेपाली कांग्रेसको १४ औं महाधिवेशनमा बागलुङ प्रतिनिधि सभा क्षेत्र नं १ प्रदेश (ख) बाट सभापतिमा मैले उम्मेदवारी दिने तयारी गरेको छु” जिल्लाखबर डटकमसंग श्रीस रानाले भन्न्नुभयो “अब राजनितिमा युवाहरुको प्रतिनिधित्व हुनुपर्छ, युवाहरुमा राजनितिक चेतना जागरण भए देश विकासमा सहयोग पुग्छ ।”
समाजसेवामा पनि सक्रिय रहनुभएका निर्माण व्यवसायी तथा युवा नेता श्रीसले युवाहरुको लागि यस अघि पनि बिभिन्न सहयोगहरु गर्दै आउनुभएको छ । हिलसाइड निर्माण सेवाका प्रोपाइटर समेत रहनुभएका श्रीसले अबका कांग्रेसीहरुले युवा नेताको खोजी गरेकाले युवाहरुको भुमिका थप आवश्यक रहेको बताउनुभयो ।
याे पनि हेर्नुहाेस् ।
नेपाली कांग्रेस जैमिनी नगर सभापतिमा युवा नेता पुरन श्रीसको दावी
संखुवासभा हत्याकाण्डः कार्की परिवारकै छिमेकी पक्राउ, बयान फेरिरहेपछि अनुसन्धानको घेरामा
विराटनगर, २७ भदाै २०७८ ।
संखुवासभाको मादीमा एकै परिवारका ६ जनाको हत्यामा संलग्न रहेको आरोपमा एक जना युवक पक्राउ परेका छन् । हत्या आरोपमा शनिबार बिहान प्रहरीले छिमेकी २६ वर्षीय लोकबहादुर कार्कीलालाई पक्राउ गरेको हो ।
पक्राउ परेका युवक मृतकका भतिजो नाता पर्ने हुन् । आइतबार सार्वजनिक गर्ने तयारी गरेको प्रहरीले हत्या आरोपी कार्कीको पूरै परिचय भने खुलाएको छैन । तर, उनको मानसिक अवस्था कमजोर रहेको र केही समयदेखि औषधि खाइरहेको प्रहरीले बताएको छ ।
प्रहरी स्रोतका अनुसार हत्यामा प्रयोग भएको रड भेटिएपछि छिमेकी युवक शङ्काको घेरामा थिए । घरभित्र रगत लागेको सर्ट भेटिएपछि प्रहरीले उनलाई पक्राउ गरेको हो ।
पक्राउ परेका व्यक्तिको सर्टमा लागेको रगत र मृतकको डिएनए परीक्षणपछि सार्वजनिक गरिने प्रहरीले बताएको छ ।
संखुवासभाका डिएसपी लालध्वज सुवेदीका अनुसार घटनाको अनुसन्धान अन्तिम चरणमा पुगेको छ । हत्या आरोपीलाई आइतबार सार्वजनिक गरिने छ ।
हत्यामा एक व्यक्तिको मात्रै संलग्नता रहेको प्रहरी स्रोतले बताएको छ । सुरुमा तेजबहादुरको हत्यापछि परिवारका अन्य सदस्यको हत्या भएको स्रोतको दाबी छ ।
गत सोमबार मादी नगरपालिका-१ का बुद्धमान कार्कीका परिवारका ६ जना सदस्यको हत्या भएको थियो । उक्त हत्याकाण्डमा बुद्धमानका छोरा ५२ वर्षीय तेजबहादुर कार्की, तेजबहादुरकी श्रीमती कमला कार्की, बुहारी ३२ वर्षीय रञ्जना कार्की, ८४ वर्षीय आमा पार्वती कार्की, ८ वर्षीय विपिन कार्की र ५ वर्षीय गोमा कार्की हत्या भएको थियो ।
‘तेजबहादुर मात्र मार्न खोजेको थिएँ, अरूले देखेपछि सबैलाई सिध्याएँ’
संखुवासभा सामूहिक हत्या काण्डमा ज्यान गुमाएका ५२ वर्षीय तेजबहादुर कार्की गत सोमबार धान गोड्ने तयारीमा थिए । त्यसका लागि खेताला लिन उनी बिहान पाँच बजेतिर घर मास्तिरको बाटो हुँदै उकालो लागेका थिए ।
तर जुन घरबाट खेताला बोलाउन जान लागेका थिए, त्यही घरका २६ वर्षीय लोकबहादुर कार्कीले बाटोमै उनको हत्या गरेको प्रहरी अनुसन्धानबाट देखिएको छ ।
जिल्ला प्रहरी कार्यालय, संखुवासभाका अनुसार मृतक तेजबहादुर दुई सय मिटर मास्तिरका भतिजो नाता समेत पर्ने छिमेकी लोकबहादुरको घरमा उनका दुई दाजुभाइलाई लिन गएका थिए । तर बाटोमै टाउको पछाडिबाट हिर्काएर तेजबहादुरको हत्या भएको खुलेको प्रहरीले बताएको छ ।
अनुसन्धानमा संलग्न एक अधिकृतका अनुसार लोकबहादुरले आफूले तेजबहादुरलाई मात्र मार्न चाहेको बयान दिएका छन् । तर घरका अन्य सदस्य पनि आएपछि अरुलाई पनि मार्न बाध्य भएको भनेका छन् ।
कराउन थालेपछि आत्तिएका उनले घरतिर समेत गएर सबैको हत्या गरेको साबिती बयान दिएको प्रहरीले जनाएको छ । यस विषयमा आइतबार पत्रकार सम्मेलन गरेर विस्तृत जानकारी सार्वजनिक गर्ने प्रहरी तयारी छ ।
के हो हत्याको कारण ?
तेजबहादुरलाई हत्या गर्नुपछाडि पनि बलियो कारण प्रहरीले खुलाउन सकेको छैन । तर लोकबहादुरको घरमा रगत लतपतिएको कपडा र हत्यामा प्रयोग भएको हतियार बरामद भएको प्रहरी बताउँछ ।
पक्राउ परेपछि लोकबहादुरले दिएको बयानअनुसार मृतक तेजबहादुर उनलाई हेप्ने गर्थे, नमिठो बोल्थे । एक वर्षअघि उनकै घरमा लोकबहादुरकी आमा लडेकी थिइन् । गम्भीर घाइते भएकी आमालाई उपचारका लागि झापाको एक अस्पताल लगिएको थियो । उपचारका क्रममा मृत्यु भयो ।
‘आमाको मृत्यु पछाडि तेजबहादुरकै षडयन्त्र भएको लोकबहादुरको बुझाइ रहेछ’ एक अनुसन्धान अधिकृतले अनलाइनखबरसँग भने, ‘त्यही रिसले हत्या गरेछन् ।’ उनी मानिसक रोगीसमेत भएको प्रहरी बताउँछ । स्रोत भन्छ, ‘एक वर्ष अघिदेखि औषधि खाइरहेको भेटिएको छ ।’
बयान फेरिरहेपछि अनुसन्धानको घेरामा परेका थिए लोकबहादुर
संखुवासभाको मादी नगरपालिका– १ खोलागाउँमा एकै परिवारका ६ जनाको हत्या भएपछि प्रहरी र स्थानीयको आशंका थियो, ‘पैसाका लागि हत्या गरेका हुनसक्छ ।’
मृतक तेजबहादुर कार्कीका दुई छोरा विदेशमा हुनु, ८० लाख रुपैयाँमा जग्गा बैना गर्नु र जग्गा पास गर्न जाने अघिल्लो दिन घटना हुनुले यो आशंका स्वाभाविक थियो । तर प्रहरी टोलीले खानतलासी गर्दा पैसा र गरगहना घरभित्रै भेट्यो ।
पहिलो शंका कमजोर भएपछि प्रहरी प्राविधिक विश्लेषणमा जुट्यो । घटना घट्नु हप्ता दिनअघि र घटना भएको २४ घण्टाको कल डिटेल रेकर्ड (सीडीआर) विश्लेषण गर्दा पनि प्रहरीले कुनै क्लू भेट्टाएन । घटनास्थल आसपास दुई वटा बीटीएस टावरको कनेक्सन थियो । घटनास्थलबाट १० किलोमिटर आसपास १५० हाराहारी मोबाइल नम्बर सक्रिय भेटिए । उनीहरुमध्ये शंकास्पद केही नम्बर प्रयोगकर्तालाई प्रहरीले बोलाएर सोधपुछ पनि गरेको थियो ।
सोधपुछका क्रममा लोकबहादुरले बयान फेरिरहेपछि केरकार गरिएको प्रहरी स्रोत बताउँछ । ‘बयान फेरेपछि उनी शंकाको घेरामा थिए,’ घटनाको अनुसन्धानमा खटिएको प्रहरी स्रोत भन्छ ।
तर ठोस उपलब्धि हात नलागेपछि प्रहरीले निष्कर्ष निकाल्यो, ‘घटनामा बाहिरका मान्छे सहभागी छैनन् ।’ अनुसन्धानमा खटिएका अधिकृतहरुका अनुसार भौगोलिक विकटताका कारण बाहिरका मान्छे आएर हत्या गरेर भागिहाल्न सक्ने अवस्था थिएन । तर तालिमप्राप्त कुकुरको प्रयोग पनि प्रभावकारी भएन ।
त्यसपछि प्रहरीले मानव जनशक्तिबाटै अनुसन्धान सुरु गर्यो । आशंकाको घेरामा गाउँलेहरु परे । पालैपालो सोधपुछ गर्दा मृतक तेजबहादुरका भतिज लोकबहादुर कार्कीको बयान बाझियो । घटनाबारे थाहा पाउने पहिलो व्यक्ति उनी थिए । उनैले लगातार बयान फेर्न थालेपछि प्रहरीले लोकबहादुरमाथि निगरानी बढायो ।
त्यसक्रममा उनको घरभित्र रगत लत्पतिएको कपडा भेटिएपछि उनलाई प्रहरीले नियन्त्रणमा लिएको छ । जिल्ला प्रहरी कार्यालय, संखुवासभाका प्रहरी नायव उपरीक्षक लालध्वज सुवेदीका अनुसार पक्राउ परेका लोकबहादुरले घटनामा आफ्नो संलग्नता स्वीकार गरेका छन् र आइतबार सबै विषय सार्वजनिक गर्ने तयारी छ ।
अनुसन्धानमा संलग्न प्रहरी अधिकृतहरुका अनुसार अनुसन्धान सुरु गर्दा उनीमाथि शंका गरिएको थिएन । हेर्दा सोझो देखिने उनको मानसिक अवस्था पनि कमजोर भएको परिवारका सदस्यहरुले बताएका थिए । तर सोधपुछका क्रममा बयान फेरिरहेपछि केरकार गरिएको प्रहरी स्रोत बताउँछ । ‘बयान फेरेपछि उनी शंकाको घेरामा थिए,’ घटनाको अनुसन्धानमा खटिएको प्रहरी स्रोत भन्छ ।
घटनाबारे अन्तर्वार्ता दिइहिँडे
लोकबहादुरलाई मृतक तेजबहादुरको शव सडक छेउमा लडिरहेको देख्ने पहिलो व्यक्ति भनिएको थियो ।
त्यसैले रिपोर्टिङका लागि पुग्नेहरुले उनलाई खोजे । उनले पनि घटनाबारे अन्तर्वार्ता दिएका छन्, जसका क्रममा बाहिरकै मान्छे आएर हत्या गरेको आशंका गरेका छन् ।
‘बडाउ(तेजबहादुर) को दुश्मनी कोहीसँग थिएन’ एउटा अन्तर्वार्तामा उनले भनेका छन्, ‘गाउँघरमा त्यस्तो शंकाको मान्छे कोही छैन मेरो विचारमा ।’
तर घटनाको अनुसन्धान गरिरहेको प्रहरीले सुनचाँदी पैसा घरमै रहेछ भनेको छ नि भन्ने प्रश्नमा उनले भने, ‘रिसइबीले नै हो कि जस्तो छ । यो घटना गम्भीर छ ।’
डराएको जस्तो देखिने उनले अन्तर्वार्ताका क्रममा राति सुत्न पनि नसकेको बताएका छन् ।
बौद्धमान कार्कीकी श्रीमती ८४ वर्षीया पार्वती, छोरा ५२ वर्षीय तेजबहादुर, बुहारी ५२ वर्षीया कमला, नातिनीबुहारी बुहारी ३२ वर्षीया रञ्जना, तेजबहादुरका नाती ११ वर्षीय दिपेन र नातिनी ७ वर्षीया गोमाको हत्या आरोपमा उनै लोकबहादुर पक्राउ परेका छन् । याे समाचार अनलाइन खबरबाट हुवहु साभार गरिएकाे हाे । यसकाे सर्वाधिकार अनलाइन खबरमा निहित रहेकाे छ ।