बौनिया । कैलालीको बर्दगोरिया गाउँपालिका वडा नम्बर ६ को कार्यालय सचिबको जिम्मेवारी सम्हालेका मदन जोशीलाई स्वागत गरिएको छ । यसअघि सचिबको जिम्मेवारी सम्हालेकी दुर्गा ढुंगानालाई पालिका खटाइएपछि वडा नम्बर ६ को कार्यालय सचिबको जिम्मेवारी जोशीलाई दिइएको थियो ।

मंगलबार जोशीलाई वडा नम्बर ६ को कार्यालयमा स्वागत गरिएको हो । वडाका सदस्य  धनशरा सुनारको सभापतित्वमा  भएको कार्यक्रमको प्रमुख अथिती वडा अध्यक्ष रामकृष्ण डगौरा थारु रहनुभएको थियो । सो क्रममा सचिब जोशीलाई स्वागत गर्दै वडा अध्यक्ष थारुले वडाबासीको सेवा प्रवाहमा सक्रिय रूपमा लाग्न सुझाव दिए ।

स्वागत तथा सम्मान कार्यक्रममा नव नियुक्ति वडा सचिब जोशीले सेवा प्रबाहमा कुनै कमि हुन नदिने प्रतिबद्धता जनाए । जोशी साबिक बर्दगोरिया गाउँपालिकाको पञ्जिकरण शाखामा  एम.आइ.एस. अपरेटर रहेका थिए ।

कार्यालय सहयोगी रितु कुमारी चौधरीले स्वागत मन्तव्य सङ्गै सुरु भएको कार्यक्रमको सञ्चालन बर्दगोरिया ६ नम्बर वडा सदस्य नेहा चौधरीले गरेकी थिइन । कार्यक्रममा विभिन्न राजनीतिक दल, थारु अगुवा(भल्मन्सा) ,समाजसेवी ,बुद्धिजीवी लगाएतको उपस्थिति थियो ।

बर्दगोरिया । कैलालीको बर्दगोरिया गाउँपालिका वडा नम्बर ३ रानीकुण्डामा अवस्थित रानीजरुवा सामुदायिक वन उपभोक्ता समुहको ९ औं वार्षिक साधारण सभा सम्पन्न भएको छ ।

आइतबार सामुदायिक वन उपभोक्ता समुहका अध्यक्ष लाल सिंह विश्वकर्माको सभापतित्वमा भएको कार्यक्रमका प्रमुख अतिथी बर्दगोरिया गाउँपालिका वडा नं ३ का वडाध्यक्ष मनऋषि आचार्य रहनु भएको थियो । यसैगरि बिशिस्ट अतिथिमा कार्यपालिका सदस्य भीम वहादुर विश्वकर्मा र बर्दगोरिया सव डिभिजन कार्यालय वन रक्षक राम वहादुर धामी रहनु भएको थियो ।

कार्यक्रममा बोल्दै प्रमुख अतिथी आचार्यले वनले समुदायलाई फाईदा पुग्ने हुदा बन जोगाउन आवस्यक रहेको बताउनु भयो । साथै वडा अध्यक्ष आचार्यले वन समितीले आर्थिक पारदर्शीताका संगै उपभोक्ता हरुलाई सस्तोमा काठ दाउरा उपलब्ध गराउनु पर्ने बताउनु भयो । सामुदायिक वनका उपाध्यक्ष भीम वहादुर बुढाले आर्थिक वर्ष २०७९ / ०८० को १२ लाख,२५  ह्जार,१ सय ६३ रुपैयाँ ३० पैंसा बराबरको आय ब्यय प्रस्तुत गर्नु भएको थियो ।

सामुदायिक वनका सदस्य वीर वहादुर सुनारले स्वागत गरेको कार्यक्रममा बर्दगोरिया गाउँपालिका वडा नम्बर ३ का वडा सदस्य राम वहादुर चौधरी, लालीगुराँस सामुदायीक वन उपभोक्ता समूहका सचिव पार्वती आचार्य, दानुवा फाटा नमूना सामुदायीक वन उपभोक्ता समूहका अध्यक्ष टेक राज जोशी, शिवशक्ति ग्रामीण विद्युत सहकारी संस्थाका अध्यक्ष आत्मा राज रिजाल, न्यू जोति आधारभूत विद्यालयका प्र. अ. उपेन्द्र सुनार, रानीजरुवा सामुदायीक वन उपभोक्ता समूहका सल्लाहकार संयोजक पदम तिरुवा,रानीजरुवा सामुदायीक वन उपभोक्ता समूहका पूर्व अध्यक्ष रवि जनाला, समाज सेवी दल वहादुर तिरूवा र पशुपति युवा क्लवका उपाध्यक्ष महेश थापा,लगाएतकाले शुभकामना मन्तव्य राख्नु भएको थियो ।

कार्यक्रमको समापन गर्दै वन जोगाउन एक जना अध्यक्ष मात्र भएर नहुने भन्दै अध्यक्ष लाल सिंह विश्वकर्माले सबै उपभोक्ताहरु जागरुक हुने पर्ने बताउनु भयो । वन समितिले विभिन्न बाटोहरु मर्मत , महिलाहरुका लागि सीप मुलक तालिम उपभोक्ताहरुलाई बंगुरका पाठाहरु पनि बितरण गर्दै आएको अध्यक्ष विश्वकर्माले बताए । आगमी आर्थिक बर्षमा बन समितिलाई उपभोक्ताले साथ दिए युवाहरुलाई रोजगार दिने उद्योग संचालन गर्ने अध्यक्ष विश्वकर्माले बताए ।

काठमाडौं । सोह्र श्राद्ध अर्थात् पितृ पक्ष आजदेखि आरम्भ भएको छ । आजै प्रतिपदा र द्वितीया तिथि श्राद्ध गर्नुपर्ने नेपाल पञ्चांग निर्णायक विकास समितिले स्वीकृति दिएका पात्रो (पञ्चांग)मा उल्लेख छ । प्रतिपदा तिथि श्राद्धको पिण्डदान अपराह्नसम्म गरिसक्नुपर्ने समितिका सदस्य प्रा.डा. देवमणि भट्टराईले जानकारी दिए ।

आश्विन कृष्ण प्रतिपदादेखि आश्विन शुक्ल प्रतिपदासम्मका सोह्रवटा तिथिमा दिवंगत  पितृलाई तर्पण, पिण्ड र सिदादान गरिने भएकाले सोह्रश्राद्ध भनिएको हो ।

चाडपर्व, यज्ञ तथा ठूलाकार्य गर्नु अघि पितृलाई श्रद्धा भक्तिका साथ सम्झिने वैदिक सनातन हिन्दू परम्पराअनुसार सोह्रश्राद्ध गर्ने गरिएको हो । सोह्रश्राद्धमा पितृले आफ्ना सन्तानबाट तर्पण, पिण्डको आश गरिरहेका हुन्छन् भन्ने शास्त्रीय मान्यता छ ।

सोह्रश्राद्ध गर्नाले पितृप्रतिको दायित्व पूरा हुनाका साथै पितृऋणबाट पनि मुक्त भइन्छ भन्ने धार्मिक विश्वास छ । यो पक्षमा श्राद्ध नगर्दा अक्षम्य दोष लाग्छ भन्ने शास्त्रीय वचनका आधारमा श्राद्ध गर्ने गरिएको प्रा.डा. रामचन्द्र गौतम बताउँछन् ।

सोह्रश्राद्ध अपराह्न कालमा गर्नुपर्छ भन्ने शास्त्रीय वचन रहेको पनि उनले बताए । जाताशौच, मृताशौच र पत्नी रजस्वला भएका अवस्थामा बाहेक सोह्रश्राद्ध छोड्न नहुने गौतमले बताए ।

कारणवश सोह्रश्राद्ध रोकिँदा शास्त्रमा अनेक विकल्प दिइएका छन् । सोह्रश्राद्ध कर्ताले आफ्ना पिताको तिथिमा गर्नुपर्ने विधान छ । आपत् धर्मअनुसार कुनै कारणवश अड्किएमा आश्विन कृष्ण औँसीदेखि आश्विन शुक्ल पञ्चमीसम्म गर्न हुने जानकारहरूको भनाइ छ ।

यो समयमा पनि कारणवश सोह्र श्राद्ध गर्न नसकिएमा कार्तिक कृष्ण औँसी अर्थात् लक्ष्मीपूजाका दिन गर्न सकिन्छ । कार्तिक कृष्ण औँसीमा पनि गर्न नसकिने भएमा वृश्चिक सङ्क्रान्ति अर्थात् मङ्सिरसम्म जुराएर गर्न सकिने धर्मसिन्धु नामक शास्त्रीय ग्रन्थमा उल्लेख गरिएको छ ।

आश्विन शुक्ल पञ्चमीपछिका अष्टमी, द्वादशी र औँसी, भरणी नक्षत्र र व्यतीपात योग परेका दिन जुनसुकै तिथि परेपनि रोकिएको सोह्रश्राद्ध गर्न सकिने शास्त्रीय विकल्पसमेत निर्णयसिन्धु, धर्मसिन्धुलगायत धर्मशास्त्रका ग्रन्थमा दिइएको नेपाल संस्कृत विश्वविद्यालय वाल्मीकि विद्यापीठ धर्मशास्त्र विभागका प्रमुखसमेत रहेका समिति सदस्य प्रा.डा. भट्टराईले जानकारी दिए ।

त्यसपछि पनि सोह्रश्राद्ध गर्न नसकिएमा सक्नेले आफैँ नसक्नेले ब्राह्मणमार्फत् दैनिक १०८ मन्त्र जप गर्न सकिने शास्त्रीय विकल्प रहेको उनले सुनाए । विधिपूर्वक यस्तो जप १० महिनासम्म गर्नुपर्छ । यो विधिबाट पनि पितृले तृप्ति प्राप्त गर्ने धार्मिक विश्वास छ ।

सोह्रश्राद्ध अपराह्नकाल पारेर पिताका तिथिका दिन गर्नुपर्नेमा कतिपय पुरोहितले आफू अनुकूल बिहानै श्राद्ध गर्नु भन्ने गरेको जानकारी आएकाले त्यो शास्त्रसम्मत नभएको समितिका अध्यक्ष प्रा. श्रीकृष्ण अधिकारीले बताए ।

पितृ पक्षको समाप्तिसँगै दुर्गा पक्ष अर्थात् बडा दसैँ सुरु हुन्छ । बडादसैँ मनाउनुअघि पितृ तृप्तिका लागि सोह्र श्राद्ध गर्ने गरिएको धर्मशास्त्रीय मत छ । ठूला पर्व वा चाड मनाउनुअघि पितृतृप्तिको कर्म गर्ने वैदिक सनातनी परम्परा छ । यस वर्ष गत साउन महिनामा अधिकमास परेकाले सोह्रश्राद्ध र बडादसैँ पर्व पछि सरेको छ । रासस

कैलाली । कैलाली जोशीपुर गाउँपालि र भजनी नगरपालिकामा आज बिहिवार स्थानीय बिदा दिएको छ । अनन्त चतुर्दशी पर्वको अवसरमा १ दिन स्थानीय बिदा दिएको सुचना मार्फत जानकारी दिएको छ ।

अनन्त चतुर्दशीको अवसरमा कार्यपालिकाको कार्यालय, वडा कार्यालयहरू, स्वास्थ्य संस्थाहरु तथा विद्यालयहरूमा स्थानीय बिदा दिइएको उल्लेख छ ।

आज अनन्त चतुर्दशी
भाद्र शुक्ल चतुर्दशीका दिन अनन्तनाथ (भगवान् विष्णु) को पूजा आराधना पनि गरिन्छ। यसैले यस दिनलाई अनन्त चतुर्दशी पनि भनिन्छ। आज चोखो धागोमा अनन्त मन्त्रण गरी बाँध्नाले वर्षभर शुभ हुन्छ भन्ने विश्वास छ।

श्रावण शुक्ल पूर्णिमाका दिन कुनै कारणवश जनै (यज्ञोपवीत) मन्त्रन नपाएकाले आजै मन्त्रने शास्त्रीय विधान रहेको धर्मशास्त्रविद् देवमणि भट्टराईले बताए अनन्त चतुर्दशीको व्रत पनि आज गर्नुपर्ने समितिले जनाएको छ। चतुर्दशीमा इन्द्रजात्रा मनाएपछि पूर्णिमामा इन्द्रदहमा गई स्नान गर्नुपर्ने धार्मिक विधि छ।